കടമറ്റം പള്ളി നിർമ്മിച്ച് നൽകുന്ന വീടിന്റെ താക്കോൽ ദാനം 12ന്

മുവാറ്റുപുഴ : ചരിത്രപ്രസിദ്ധമായ കടമറ്റം സെന്റ് ജോർജ് ഓർത്തഡോക്സ് പള്ളിയുടെ നേതൃത്വത്തിൽ സ്നേഹവീട് ഒരുങ്ങി.കെ. ചിറ്റിലപ്പിള്ളി ഫൗണ്ടേഷന്റെയും വാളകം ലയൺസ് ക്ലബ്ബിന്റെയും സഹകരണത്തോടെയാണ് ഭവനം നിർമ്മിച്ചത്. വീടിന്റെ കൂദാശയും താക്കോൽ കൈമാറ്റവും സെപ്റ്റംബർ 12-ന് നടക്കും.

തൃശൂർ മുണ്ടത്തിക്കോട് വെടിക്കെട്ട് ദുരന്തത്തിന്റെ പശ്ചാത്തലത്തിൽ പള്ളികളിലെ പെരുന്നാൾ ആഘോഷങ്ങളിൽ വെടിക്കെട്ട് ഒഴിവാക്കണമെന്ന് ഓർത്തഡോക്സ് സഭാധ്യക്ഷൻ പരിശുദ്ധ ബസേലിയോസ് മാർത്തോമാ മാത്യൂസ് തൃതീയൻ കാതോലിക്കാ ബാവ ആഹ്വാനം ചെയ്തിരുന്നു. ഈ ആഹ്വാനം ഏറ്റെടുത്ത് സ്നേഹ ചലഞ്ചിന്റെ ഭാഗമായാണ് കടമറ്റം പള്ളി പെരുന്നാളിന് വെടിക്കെട്ട് ഒഴിവാക്കിയത്. ആ തുക ഉപയോഗിച്ചാണ് ഇടവകയിലെ നിർധന കുടുംബത്തിന് വേണ്ടി ഈ വീട് നിർമ്മിച്ചു നൽകുന്നത്.

രണ്ട് ബെഡ്റൂം, ഹാൾ, അടുക്കള, വരാന്ത, വർക്ക് ഏരിയ എന്നിവയോട് കൂടിയതാണ് പുതിയ ഭവനം.വീട് കൂദാശ 12ന് ഉച്ചകഴിഞ്ഞ് 3ന് പരിശുദ്ധ ബസേലിയോസ് മാർത്തോമാ മാത്യൂസ് തൃതീയൻ കാതോലിക്കാ ബാവ നിർവഹിക്കുമെന്ന് വികാരി ഫാ. റോബിൻ മർക്കോസ്, സഹ വികാരി ഫാ. ജോമോൻ കെ. ജോർജ്, ട്രസ്റ്റിമാരായ സി.കെ. ജോർജ്, വി.എ. ജോയ്, സെക്രട്ടറി എം.പി. കുര്യാച്ചൻ, ലയൺസ് ക്ലബ്ബ് പ്രസിഡന്റ് ഗിൽസൺ തോമസ്, സെക്രട്ടറി ഒ.പി. ജോസ്, ട്രഷറർ ജോയ് ജോസഫ്, ലയൺസ് ഡിസ്ട്രിക്ട് ഗവർണർ വി.എസ്. ജയേഷ്, യു. റോയി, പ്രാർത്ഥനാ യോഗം യൂണിറ്റ് സെക്രട്ടറി സോജൻ വർഗീസ്, മാനേജിംഗ് കമ്മിറ്റി അംഗം സി.പി. തങ്കച്ചൻ എന്നിവർ അറിയിച്ചു.