ദൈവകൃപയും പരുമല തിരുമേനിയുടെ മധ്യസ്ഥതയുമാണ് വഴികാട്ടി; കാതോലിക്കാ ബാവാ

പത്തനംതിട്ട :മലങ്കര ഓർത്തഡോക്സ് സുറിയാനി സഭയുടെ പരമാധ്യക്ഷൻ പരിശുദ്ധ ബസേലിയോസ് മാർത്തോമ്മാ മാത്യൂസ് തൃതീയൻ കാതോലിക്കാ ബാവായുടെ മലങ്കര മെത്രാപ്പോലീത്താ സ്ഥാനാരോഹണത്തിന്റെ അഞ്ചാം വാർഷികം ലളിതമായ ചടങ്ങുകളോടെയാഘോഷിച്ചു. ദൈവീക കൃപയും പരിശുദ്ധ പരുമല തിരുമേനിയുടെ മധ്യസ്ഥതയുമാണ് സഭാ നേതൃത്വത്തിൽ തന്നെ വഴിനടത്തുന്നതെന്ന് മലങ്കര സഭാധ്യക്ഷൻ പറഞ്ഞു.

മലങ്കര മെത്രാപ്പോലീത്താ സ്ഥാനാരോഹണത്തിന്റെ അഞ്ചാം വാർഷികത്തോടനുബന്ധിച്ച് പരുമല സെമിനാരിയുടെ ആഭിമുഖ്യത്തിൽ നടന്ന അനുമോദന സമ്മേളനത്തിൽ സംസാരിക്കുകയായിരുന്നു പരിശുദ്ധ കാതോലിക്ക ബാവ .വിശുദ്ധ കുർബാനയിൽ നിരവധി പേർ തനിക്കായി പ്രാർത്ഥിക്കുന്നുണ്ടെന്നും, എല്ലാ പ്രതിസന്ധി ഘട്ടങ്ങളിലും ആ പ്രാർത്ഥനയാണ് തനിക്ക് ബലമേകുന്നതെന്നും കാതോലിക്ക ബാവാ വ്യക്തമാക്കി.

സഹോദര മെത്രാപ്പോലീത്താമാരിൽ നിന്നും, സഭാ സ്ഥാനികളിൽ നിന്നും, വിവിധ സമിതികളിൽ നിന്നും, വിശ്വാസി സമൂഹത്തിൽ നിന്നും ലഭിക്കുന്ന പിന്തുണയാണ് കഴിഞ്ഞ അഞ്ച് വർഷത്തെ പ്രവർത്തനങ്ങൾക്ക് ഊർജ്ജം പകർന്നതെന്നും ബാവാ കൂട്ടിച്ചേർത്തു.

2021 ഒക്ടോബർ 14ന് പരുമലയിൽ ചേർന്ന മലങ്കര സുറിയാനി ക്രിസ്ത്യാനി അസോസിയേഷനാണ് പരിശുദ്ധ മാത്യൂസ്‌ തൃതീയൻ ബാവായെ പൗരസ്ത്യ കാതോലിക്കായായി തിരഞ്ഞെടുത്തത്. ‘നിലപാടുകളുടെ രാജകുമാരൻ’ എന്നറിയപ്പെടുന്ന പുണ്യശ്ലോകനായ പൗലോസ് ദ്വിതീയൻ ബാവയുടെ പിൻഗാമിയായി മലങ്കര സഭയുടെ 22-ാമത്തെ മലങ്കര മെത്രാപ്പോലീത്തയും 9-ാമത്തെ കാതോലിക്കയുമായാണ് സ്ഥാനമേറ്റത്.

പരുമലയിൽ നടന്ന അനുമോദന സമ്മേളനത്തിൽ പരിശുദ്ധ എപ്പിസ്കോപ്പൽ സുന്നഹദോസ് സെക്രട്ടറി ഡോ. യൂഹാനോൻ മാർ ക്രിസോസ്റ്റമോസ്, അങ്കമാലി ഭദ്രാസനാധിപൻ യൂഹാനോൻ മാർ പോളിക്കാർപ്പോസ്, വൈദിക ട്രസ്റ്റി ഫാ. ഡോ. തോമസ് വർഗീസ് അമയിൽ, അൽമായ ട്രസ്റ്റി റോണി വർഗീസ് ഏബ്രഹാം, അസോസിയേഷൻ സെക്രട്ടറി അഡ്വ. ബിജു ഉമ്മൻ, സെമിനാരി മാനേജർ വെരി റവ. യാക്കോബ് തോമസ് റമ്പാൻ, പരുമല ആശുപത്രി സി.ഇ.ഒ ഫാ. എം.സി പൗലോസ്, നിരണം ഭദ്രാസന സെക്രട്ടറി ഫാ. അലക്സാണ്ടർ ഏബ്രഹാം, വർക്കിംഗ് കമ്മിറ്റി അംഗം ജേക്കബ് മാത്യു ദുബായ്, മാനേജിംഗ് കമ്മിറ്റി-പരുമല കൗൺസിൽ അംഗങ്ങൾ, വൈദികർ, വിശ്വാസികൾ തുടങ്ങിയവർ ആശംസകൾ അറിയിച്ചു.

തുടർന്ന് പരുമല സെമിനാരിയിൽ നവീകരിച്ച എ.സി. ഓഡിറ്റോറിയത്തിന്റെ കൂദാശ കർമ്മം പരിശുദ്ധ കാതോലിക്കാ ബാവാ നിർവഹിച്ചു.