അപകീർത്തിപ്പെടുത്തൽ ; യാക്കോബായ ഹാൻഡിലിന് ഇന്ത്യയിൽ വിലക്ക്
ന്യൂഡൽഹി :മലങ്കര ഓർത്തഡോക്സ് സുറിയാനി സഭയുടെ പരമാധ്യക്ഷനെയും അഭിവന്ദ്യ പിതാക്കന്മാരെയും അപകീർത്തിപ്പെടുത്തി വിദ്വേഷവും അധിക്ഷേപവും നിറഞ്ഞ ഉള്ളടക്കങ്ങൾ നിരന്തരം പ്രസിദ്ധീകരിച്ച യാക്കോബായ ഫേസ്ബുക്ക് ഹാൻഡിലിന് പ്രവർത്തന നിരോധനം .
ഓർത്തഡോക്സ് സഭ നൽകിയ നിയമപരമായ പരാതിയുടെ അടിസ്ഥാനത്തിൽ മെറ്റയാണ് നടപടി സ്വീകരിച്ചത്. യാക്കോബായ വിഭാഗത്തിന്റെ മുഖമെന്ന് അറിയപ്പെടുന്ന ഫേസ്ബുക്ക് പേജിനാണ് ഇന്ത്യയിൽ വിലക്ക് ഏർപ്പെടുത്തിയത്.
മലങ്കര സഭാധ്യക്ഷന്റെ ചിത്രങ്ങൾ വികൃതമാക്കി ദിവസേന ഒന്നിലധികം അപകീർത്തികരമായ കാർഡുകളും വീഡിയോകളും ഇവർ പ്രചരിപ്പിച്ചിരുന്നു. വിലക്ക് പ്രാബല്യത്തിൽ വന്നതോടെ ഇത്തരം ഉള്ളടക്കങ്ങൾ പോസ്റ്റ് ചെയ്യാതെ ഇവർ ജാഗ്രത പുലർത്തുന്നുണ്ട്. വിലക്ക് മറികടക്കാനുള്ള ശ്രമങ്ങളും നടക്കുന്നതായി സൂചനയുണ്ട്.
അതേസമയം, വ്യാജ വാർത്തകൾ പ്രസിദ്ധീകരിക്കുന്ന യൂട്യൂബ് ചാനലിനും ഉടമയ്ക്കുമെതിരെ കോടതി കേസെടുത്തു. തിരുവനന്തപുരം കേന്ദ്രമാക്കി പ്രവർത്തിക്കുന്ന സ്ഥാപനത്തിനെതിരെ സംസ്ഥാനത്തുടനീളം നിരവധി പരാതികൾ ഉയർന്നിട്ടുണ്ട്.
