ഓർത്തഡോക്സ് സഭയുടെ വയനാട് പുനരധിവാസ പദ്ധതിക്ക് തുടക്കം

സുൽത്താൻ ബത്തേരി:വയനാട് ചൂരൽമല ദുരന്തബാധിതരുടെ പുനരധിവാസത്തിനായി ഭൂമി വാങ്ങി വീടുകൾ നിർമ്മിച്ച് നൽകുന്ന മലങ്കര ഓർത്തഡോക്സ് സുറിയാനി സഭയുടെ പദ്ധതിക്ക് തുടക്കമായി.

മേപ്പാടി പഞ്ചായത്തിലെ ഏഴാംചിറയിൽ മലങ്കര സഭ വാങ്ങിയ ഒരേക്കറോളം ഭൂമി 18 കുടുംബങ്ങളുടെ പേരിൽ ഇതിനകം രജിസ്റ്റർ ചെയ്ത് നൽകി. പുനരിധിവാസ പദ്ധതിയുടെ ഭാഗമായി ആകെ 50 വീടുകളാണ് നിർമ്മിക്കാൻ ലക്ഷ്യമിടുന്നത് . ഇതിന്റെ ആദ്യഘട്ടത്തിൽ 13 വീടുകൾക്ക് മലങ്കര സഭാധ്യക്ഷൻ ബസേലിയോസ് മാർത്തോമ്മാ മാത്യൂസ് തൃതീയൻ കാതോലിക്കാ ബാവ തറക്കല്ലിട്ടു.

കൽപ്പറ്റ എംഎൽഎയും മന്ത്രിയുമായ ടി. സിദ്ദിഖ്, മെത്രാപ്പോലീത്തമാരായ ഡോ. എബ്രഹാം മാർ സെറാഫിം, ഡോ. ഗീവർഗീസ് മാർ ബർണബാസ്, സഭാ വൈദിക ട്രസ്റ്റി ഫാ. ഡോ. തോമസ് വർഗീസ് അമായിൽ, അൽമായ ട്രസ്റ്റി റോണി വർഗീസ് എബ്രഹാം, അസോസിയേഷൻ സെക്രട്ടറി ബിജു ഉമ്മൻ, സുൽത്താൻ ബത്തേരി ഭദ്രാസന സെക്രട്ടറി ഫാ. ബേബി ജോൺ, മേപ്പാടി പഞ്ചായത്ത് പ്രസിഡന്റ് റംല ഹംസ, തദ്ദേശ സ്വയംഭരണ ജനപ്രതിനിധികൾ, വൈദികർ, ഗുണഭോക്താക്കൾ തുടങ്ങിയവർ പങ്കെടുത്തു.

ഏകദേശം 12 ലക്ഷം രൂപ ചെലവിൽ നിർമ്മിക്കുന്ന ഓരോ വീടിലും രണ്ട് കിടപ്പുമുറികൾ, സ്വീകരണമുറി, അടുക്കള, ശുചിമുറി, സിറ്റൗട്ട് എന്നിവ ഉണ്ടാകും.

തുടക്കമായത് ആദ്യ ഘട്ടം

ആദ്യഘട്ടത്തിൽ 13 വീടുകളാണ് നിർമ്മിക്കുന്നത്. ലിസ്റ്റിൽ ഉൾപ്പെട്ടിട്ടുള്ളവരിൽ ചിലർക്ക് സർക്കാരിൽ നിന്ന് വീട് ലഭിക്കാൻ സാധ്യതയുള്ളതിനാൽ, അക്കാര്യത്തിൽ വ്യക്തത വരുത്തിയ ശേഷം ശേഷിക്കുന്ന 5 വീടുകൾ കൂടി നിർമ്മിക്കുമെന്ന് ഓർത്തഡോക്സ്‌ സഭയുടെ പബ്ലിക് റിലേഷൻസ് വിഭാഗം അറിയിച്ചു.

ചൂരൽമല പള്ളിയുടെ പുനരുദ്ധാരണം ഏറ്റെടുത്തു ; ഇടവകാംഗങ്ങൾക്കും വീട്

വയനാട് ഉരുൾപൊട്ടലിൽ നാശം വിതച്ച ചൂരൽമല സെന്റ് ജോർജ് ഓർത്തഡോക്സ്‌ പള്ളിയെ കരുതാൻ മലങ്കര ഓർത്തഡോക്സ് സുറിയാനി സഭ.ഉരുൾപൊട്ടലിൽ തകർന്ന ചൂരൽമല പള്ളിയുടെ പുനരുദ്ധാരണത്തിന് ഇനി ആവശ്യമായ 25 ലക്ഷം രൂപ അനുവദിക്കുകയും നിർമ്മാണം ആരംഭിക്കുകയും ചെയ്തു.ചൂരൽമല പള്ളിയിലെ 2 അംഗങ്ങൾക്ക് വീടുകൾ വെക്കുന്നതിനായി 10 ലക്ഷം രൂപ വീതം സഭ അനുവദിച്ചു.ഇതിന് പുറമെ കുറ്റിച്ചാർമലയിലെ 5 കുടുംബങ്ങൾക്കും സഭ വീടുകൾ നൽകും.

രണ്ടാം ഘട്ടത്തിൽ ദുരിതാശ്വാസ ക്യാമ്പിന് പകരം സുരക്ഷിത കേന്ദ്രം

വയനാട് പുനരധിവാസ പദ്ധതിയുടെ രണ്ടാം ഘട്ടത്തിൽ ദുരിതാശ്വാസ ക്യാമ്പിന് പകരം സുരക്ഷിത കേന്ദ്രം ഒരുക്കാൻ മലങ്കര ഓർത്തഡോക്സ് സുറിയാനി സഭ.
പ്രകൃതി ദുരന്തങ്ങളാൽ വീർപ്പുമുട്ടി കഴിയുന്ന മലയോര ജനതയ്ക്കായി വയനാട്ടിൽ സഭയുടെ റീഹാബിലിറ്റേഷൻ സെന്ററാണ് സുരക്ഷിത കേന്ദ്രമായി ഒരുക്കുന്നത്.

ചൂരൽമല ഇടവകയിലെ 16 കുടുംബങ്ങൾക്ക് ഈ സെന്റർ സുരക്ഷിത കേന്ദ്രമാകും. പ്രകൃതിക്ഷോഭ സമയത്ത് സൗജന്യമായി സെന്ററിൽ താമസിക്കാൻ സൗകര്യം ഒരുക്കും.

മൂന്നാം ഘട്ടത്തിൽ 50 വീടുകൾ എന്ന ദൗത്യം പൂർത്തിയാക്കും

വയനാട് പുനരധിവാസത്തിന്റെ ഭാഗമായി ശേഷിക്കുന്ന ഭവനങ്ങൾ സുൽത്താൻ ബത്തേരി ഭദ്രാസനത്തിന്റെ നിർദേശം കൂടി പരിഗണിച്ച് 50 വീടുകൾ എന്ന ദൗത്യം പൂർത്തിയാക്കും.

സമാഹരിച്ചത് ഏഴ് കോടിയോളം രൂപ

വയനാട് പുനരധിവാസത്തിനായി മലങ്കര ഓർത്തഡോക്സ് സുറിയാനി സഭയുടെ ആഹ്വാനം ഏറ്റെടുത്ത് വിശ്വാസികൾ സമാഹരിച്ച തുകയുടെ കണക്ക് പുറത്തുവിട്ടു.

ലോക്കൽ ഫണ്ട് ഇനത്തിൽ 6,81,54,584രൂപയും, എഫ്.സി.ആർ.എ ഇനത്തിൽ ₹ 68,31,464/ രൂപയും ഉൾപ്പെടെ ആകെ ₹ 7,49,86,048/ രൂപയാണ് വയനാടിനായി മലങ്കരമക്കൾ സഭയുടെ കരങ്ങളിൽ ഏൽപ്പിച്ചത്.

പരിശുദ്ധ സഭയുടെ ആഹ്വാനം ഏറ്റെടുത്ത് നിറഞ്ഞ മനസോടെ നാടിന് കൈത്താങ്ങായയെന്ന് ഓർത്തഡോക്സ് സഭ മാധ്യമ വിഭാഗം പുറത്തിറക്കിയ കാർഡിൽ അറിയിച്ചു.