1934 ഭരണഘടന പരിഷ്കരണം ; നിർദ്ദേശങ്ങൾ ക്ഷണിച്ച് ഓർത്തഡോക്സ് സഭ

കോട്ടയം: മലങ്കര ഓർത്തഡോക്സ് സുറിയാനി സഭയുടെ 1934-ലെ ഭരണഘടന ഭേദഗതി ചെയ്യുന്നതുമായി ബന്ധപ്പെട്ട് അഭിപ്രായങ്ങളും നിർദ്ദേശങ്ങളും ക്ഷണിച്ച് മലങ്കര സഭാ അധ്യക്ഷൻ പരിശുദ്ധ ബസേലിയോസ് മാർത്തോമ്മാ മാത്യൂസ് തൃതീയൻ കാതോലിക്കാ ബാവാ കൽപ്പന പുറപ്പെടുവിച്ചു.

1934-ൽ രൂപീകൃതമായ സഭാ ഭരണഘടനയിൽ അന്നുമുതൽ ഇന്നുവരെ കാലോചിതമായ ഭേദഗതികൾ വരുത്തിയിട്ടുണ്ടെങ്കിലും 2011-ന് ശേഷം ഭേദഗതികൾ ഒന്നും വരുത്തിയിട്ടില്ലെന്ന് കൽപ്പനയിൽ ചൂണ്ടിക്കാണിക്കുന്നു. മലങ്കര സഭയുടെ സുഗമമായ ഭരണനിർവ്വഹണത്തിന് കാലാനുസൃതമായ മാറ്റങ്ങൾ അനിവാര്യമാണെന്ന വിലയിരുത്തലിലാണ് പുതിയ നീക്കം.

ഭരണഘടനയിലെ 126, 127 വകുപ്പുകൾ അനുസരിച്ച് 2022 ഡിസംബർ 6-ലെ MOSC/CMM/406/2022 നമ്പർ കൽപ്പന പ്രകാരം രൂപീകരിച്ച പഠനസമിതി തയ്യാറാക്കിയ മാർഗ്ഗനിർദ്ദേശങ്ങൾ 15.04.2026-ലും 30.09.2026-ലും ചേർന്ന സഭാ മാനേജിംഗ് കമ്മിറ്റി യോഗങ്ങളിൽ വിശദമായി ചർച്ച ചെയ്തിരുന്നു. ഇതിന്റെ തുടർനടപടിയായാണ് ഭദ്രാസനങ്ങളുടെയും വിശ്വാസികളുടെയും അഭിപ്രായം തേടുന്നത്.

നിർദ്ദേശങ്ങൾ അസോസിയേഷൻ സെക്രട്ടറി, കാതോലിക്കേറ്റ് ഓഫീസ്, ദേവലോകം പി.ഒ, മുട്ടമ്പലം, കോട്ടയം – 686004 എന്ന വിലാസത്തിലോ catholicateoffice@mosc.in എന്ന ഇ-മെയിലിലോ അയക്കാവുന്നതാണ്.നിർദ്ദേശങ്ങൾ അയക്കുമ്പോൾ മൂന്ന് കാര്യങ്ങൾ നിർബന്ധമായും വ്യക്തമാക്കണം. ഒന്ന്, ഭരണഘടനയിലെ ഏത് വകുപ്പിനാണ് ഭേദഗതി നിർദ്ദേശിക്കുന്നത്. രണ്ട്, ഭേദഗതി വരുത്തുമ്പോൾ ആ വകുപ്പ് ഏത് രൂപത്തിലായിരിക്കണം എന്ന് കൃത്യമായി രേഖപ്പെടുത്തണം. മൂന്ന്, എന്തുകൊണ്ടാണ് ഭേദഗതി നിർദ്ദേശിക്കുന്നത് എന്ന് ചുരുങ്ങിയ വാക്കുകളിൽ വിശദീകരിക്കണം.

എല്ലാ നിർദ്ദേശങ്ങളും 2026 ഡിസംബർ 31-ന് മുമ്പായി ലഭിച്ചിരിക്കണമെന്ന് കൽപ്പനയിൽ കർശനമായി നിർദ്ദേശിച്ചിട്ടുണ്ട്.