മലങ്കര സഭാ അധ്യക്ഷന് ബഹ്‌റൈന്റെ സ്നേഹാദരം
മനാമ: ബഹ്റൈൻ കിരീടാവകാശിയും പ്രധാനമന്ത്രിയുമായ പ്രിൻസ് സൽമാൻ ബിൻ ഹമദ് അൽ ഖലീഫയുമായി മലങ്കര ഓർത്തഡോക്സ് സുറിയാനി സഭയുടെ പരമാധ്യക്ഷൻ പരിശുദ്ധ ബസേലിയോസ് മാർത്തോമ്മാ മാത്യൂസ് തൃതീയൻ കാതോലിക്കാ ബാവാ കൂടിക്കാഴ്ച നടത്തി. പ്രധാനമന്ത്രിയുടെ കൊട്ടാരത്തിൽ വെച്ച് നടന്ന കൂടിക്കാഴ്ചയിൽ മതസൗഹാർദ്ദത്തിന്റെയും സഹിഷ്ണുതയുടെയും പ്രാധാന്യം ഇരുവരും ചർച്ച ചെയ്തു.
ബഹ്റൈൻ പാരമ്പര്യമായി ഉയർത്തിപ്പിടിക്കുന്നത് മതസഹിഷ്ണുത, സഹവർത്തിത്വം, ബഹുസ്വരത എന്നീ മൂല്യങ്ങളാണെന്നും രാജ്യത്തെ ആരാധനാലയങ്ങൾ വിവിധ മതങ്ങൾ തമ്മിലുള്ള പരസ്പര ബഹുമാനം വളർത്തുന്നതിൽ വലിയ പങ്ക് വഹിക്കുന്നുണ്ടെന്നും കിരീടാവകാശി പറഞ്ഞു.
ബഹ്റൈൻ ഭരണ നേതൃത്വം കാണിക്കുന്ന ദീർഘവീക്ഷണത്തെയും മതസൗഹാർദ്ദം പ്രോത്സാഹിപ്പിക്കുന്നതിനുള്ള പിന്തുണയെയും കാതോലിക്കാ ബാവാ പ്രശംസിക്കുകയും നന്ദി അറിയിക്കുകയും ചെയ്തു. തുടർന്ന് രാജ്യത്തിന്റെ സ്നേഹാദര സൂചകമായി കിരീടാവകാശി പരിശുദ്ധ ബാവായ്ക്ക് ഗോൾഡൻ വിസ സമ്മാനിച്ചു.
പ്രധാനമന്ത്രിയുടെ കോർട്ട് മന്ത്രി ശൈഖ് ഈസ ബിൻ സൽമാൻ ബിൻ ഹമദ് അൽ ഖലീഫ, ധനമന്ത്രി ശൈഖ് സൽമാൻ ബിൻ ഖലീഫ അൽ ഖലീഫ, ഫാ. തോമസുകുട്ടി പി.എൻ, ഫാ. റിജോ ചാക്കോ, ഫാ. ഗീവർഗീസ് ജോൺസൺ, എബി കുരുവിള, ജോൺ കെ.പി, സോമൻ ബേബി തുടങ്ങിയവർ സന്നിഹിതരായിരുന്നു.
ബഹ്റൈൻ സെന്റ് മേരീസ് ഓർത്തഡോക്സ് കത്തീഡ്രലിന്റെ പെരുന്നാൾ ശുശ്രൂഷകൾക്ക് നേതൃത്വം നൽകാനാണ് പരിശുദ്ധ കാതോലിക്ക ബാവാ ബഹ്റൈനിൽ എത്തിയത്.
