പാത്രിയാർക്കീസ് തർക്ക പള്ളികളിലേക്ക് ; ആത്മാർത്ഥത വേണമെന്ന് ഓർത്തഡോക്സ് സഭ

കോട്ടയം: സർക്കാർ അതിഥിയായി പൊതു ഖജനാവിൽ നിന്ന് പണം ചെലവഴിച്ച് കേരളത്തിൽ സന്ദർശനം നടത്തുന്ന പാത്രിയാർക്കീസിന്റെ വാക്കുകളും പ്രവർത്തികളും തമ്മിൽ പൊരുത്തമില്ലെന്ന് ഓർത്തഡോക്സ് സഭ. തർക്കം നിലനിൽക്കുന്ന മണർകാട് പള്ളിയിൽ ഞായറാഴ്ച കുർബാന നടത്താനുള്ള നീക്കമാണ് വിവാദത്തിന് വഴിവെച്ചത്.
മണർകാട് പള്ളി മലങ്കര മെത്രാപ്പോലീത്തായുടെ നിയമാനുസൃത അധീനതയിലുള്ളതാണെന്നും, യാക്കോബായ വിഭാഗം കൈവശം വച്ചിരിക്കുകയാണെന്നും ഓർത്തഡോക്സ്‌ സഭ ചൂണ്ടിക്കാട്ടി. പ്രസ്താവനകളിൽ ആത്മാർത്ഥത വേണമെന്നാണ് ഓർത്തഡോക്സ് സഭയുടെ ആവശ്യം.

പാത്രിയാർക്കീസ് ബാവയ്ക്ക് മലങ്കര സഭയുടെ പള്ളികളിൽ പ്രവേശിക്കണമെങ്കിൽ മലങ്കര മെത്രാപ്പോലീത്തായുടെ അനുമതി നിർബന്ധമാണെന്ന് ഓർത്തഡോക്സ് സഭ മാധ്യമ വിഭാഗം പ്രസിഡന്റ് ഡോ. യുഹാനോൻ മാർ ദിയസ്ക്കോറോസ് പറഞ്ഞു. 1995-ലെ കോടതി വിധിയിൽ ഇക്കാര്യം വ്യക്തമാക്കിയിട്ടുണ്ട്. 2017-ലെ സുപ്രീംകോടതി വിധി മലങ്കര സഭയിൽ സമാന്തര ഭരണം അനുവദിക്കുന്നില്ലെന്നും അദ്ദേഹം ഓർമ്മിപ്പിച്ചു.

സമാധാനത്തിലേക്കുള്ള വഴി കോടതികളെ വെല്ലുവിളിച്ചുകൊണ്ടാകരുതെന്നും പത്രക്കുറിപ്പിൽ പറയുന്നു. നിർഭാഗ്യവശാൽ, നിയമലംഘനത്തിന് ഭരണസംവിധാനങ്ങൾ തന്നെ കുടപിടിക്കുന്ന സ്ഥിതിയാണ് കാണുന്നതെന്നും അദ്ദേഹം കുറ്റപ്പെടുത്തി. ഇത് ഭരണഘടനാ മൂല്യങ്ങൾക്ക് യോജിച്ചതല്ല. ഭാരതത്തിന്റെ ഭരണഘടനയും നിയമങ്ങളും പാലിക്കാൻ എല്ലാവരും ബാധ്യസ്ഥരാണ്.

1876-ലെ മുളന്തുരുത്തി സുന്നഹദോസിനെക്കുറിച്ച് സംസാരിക്കുന്നവർ, ആ സുന്നഹദോസിന്റെ അധ്യക്ഷനായി തിരഞ്ഞെടുക്കപ്പെട്ട പുലിക്കോട്ടിൽ ജോസഫ് മാർ ദീവന്നാസിയോസ് തിരുമേനിയെ മറക്കുന്നതും ചരിത്രത്തോടുള്ള വെല്ലുവിളിയാണെന്ന് പത്രക്കുറിപ്പ് ചൂണ്ടിക്കാട്ടി. കിഴക്കൻ സുറിയാനി പാരമ്പര്യവും പടിഞ്ഞാറൻ സുറിയാനി പാരമ്പര്യവും തമ്മിലുള്ള വ്യത്യാസം മനസിലാക്കാതെയുള്ള പരാമർശങ്ങൾ തെറ്റിദ്ധാരണ ഉണ്ടാക്കുന്നതാണ്. ചരിത്രത്തെ മറയ്ക്കാനുള്ള ശ്രമം ഇരുട്ടുകൊണ്ട് ഓട്ടയടയ്ക്കുന്നതിന് തുല്യമാണെന്നും പത്രക്കുറിപ്പിൽ പറയുന്നു.