പാത്രിയാർക്കീസിന്റെ വിവാദ സന്ദർശനം ; ഹൈക്കോടതിയിൽ യാക്കോബായ വിഭാഗത്തിന് തിരിച്ചടി

കൊച്ചി: പാത്രിയാർക്കീസ് ബാവായുടെ കേരള സന്ദർശനം നിയമപരമായി പരിശോധിക്കാൻ ഹൈക്കോടതി പോലീസിനോട് ആവശ്യപ്പെട്ടു. സന്ദർശനത്തിൽ വിസ നിബന്ധനകളുടെ ലംഘനമുണ്ടോ എന്നതാണ് പ്രധാനമായും പരിശോധിക്കേണ്ടത്.2017-ലെ സുപ്രീംകോടതി വിധിക്ക് വിരുദ്ധമായി മലങ്കര സഭയുടെ പള്ളികളിൽ ഏകപക്ഷീയ പ്രവേശനം നടക്കുന്നുണ്ടോയെന്നും പരിശോധിക്കണമെന്ന് കോടതി വ്യക്തമാക്കി.

മണർകാട് പള്ളിയിലേക്കുള്ള പാത്രിയാർക്കീസിന്റെ വരവിനെ ചോദ്യം ചെയ്ത് സഭാ വിശ്വാസികൾ സമർപ്പിച്ച ഹർജി പരിഗണിച്ചാണ് ഈ നിർദ്ദേശം.

കോടതി നോട്ടീസ് നൽകാനെത്തിയ ഉദ്യോഗസ്ഥനോട് മോശമായി പെരുമാറുകയും കൈയേറ്റത്തിന് മുതിരുകയും ചെയ്തവർക്കെതിരെ കർശന നടപടി എടുക്കാനും ഹൈക്കോടതി ഉത്തരവിട്ടിട്ടുണ്ട്.നിയമം ലംഘിക്കുന്ന ഒരു നടപടിയും സന്ദർശനത്തിന്റെ പേരിൽ ഉണ്ടാകരുതെന്നാണ് കോടതിയുടെ നിലപാട്.

പാത്രിയർക്കീസിന് അനുവദിക്കപ്പെട്ട വിസക്ക് പരിമിതികളെന്ന് ഇമ്മീഗ്രേഷൻ വിദഗ്ദർ 

 പരിശുദ്ധ പാത്രിയാർക്കീസ് ബാവയുടെ കേരള സന്ദർശനം എക്സ്-മിസ്ക് (മിസലേനിയസ് എൻട്രി) വിസയിലാണ്.ഈ വിസയിൽ ഇന്ത്യയിലെത്തുന്ന വിദേശ മതപുരോഹിതന് മതപരമായ ചടങ്ങുകളിൽ പങ്കെടുക്കാൻ മാത്രമേ അനുവാദമുള്ളൂ. ചടങ്ങുകൾക്ക് കാർമികത്വം വഹിക്കാനോ, കുർബാന അർപ്പിക്കാനോ ഈ വിസ അനുമതി നൽകുന്നില്ലെന്ന് വ്യക്തമാക്കുന്നു.

മണർകാട് ഉൾപ്പെടെയുള്ള പള്ളികളിൽ കുർബാന നടത്താനുള്ള നീക്കം വിസ നിബന്ധനകളുടെ ലംഘനമാകുമോയെന്നാണ് ഇപ്പോൾ ഉയരുന്ന ചോദ്യം.