പാത്രിയാർക്കീസിന്റെ സന്ദർശനം ; തർക്ക പള്ളികളിലെ പ്രവേശനത്തിനെതിരെ പരാതി

കോട്ടയം: സർക്കാർ അതിഥിയായി കേരളത്തിലെത്തുന്ന പാത്രിയാർക്കീസ് ബാവയുടെ ഇടപെടൽ  കുരുക്കിലേക്ക്. തർക്കമുള്ള പള്ളികളിൽ പ്രവേശിച്ച് ആത്മീയ കർമ്മങ്ങൾ നടത്താനുള്ള നീക്കത്തിനെതിരെ കേന്ദ്ര ആഭ്യന്തര മന്ത്രാലയത്തിന് കീഴിലുള്ള  ഏജൻസിയായ Foreigners Regional Registration Office  പരാതിയും കോട്ടയം സബ് കോടതിയിൽ ഹർജിയും .

മലങ്കര സഭയുടെ പള്ളികൾ 1934-ലെ ഭരണഘടന പ്രകാരം മാത്രമേ ഭരിക്കപ്പെടാവൂ എന്ന ഓർത്തഡോക്സ് സഭയുടെ നിലപാട് പരമോന്നത നീതി പീഠം ശെരിവെച്ചിരിക്കുന്നു. പാത്രിയാർക്കീസിന് മലങ്കര സഭയിൽ ഭരണാധികാരം ഇല്ലാതായതായും പരാതിയിൽ പറയുന്നു. പള്ളികളിൽ യാക്കോബായ  മെത്രാൻമാർക്ക് നിരോധനമുള്ള പശ്ചാത്തലത്തിൽ നടത്തുന്ന സന്ദർശനം വിസ ചട്ടങ്ങളുടെ ലംഘനമാണെന്നും ആരോപണമുണ്ട്.

മണർകാട് ഉൾപ്പെടെയുള്ള തർക്ക പള്ളികളിൽ പ്രവേശിച്ച് കുർബാന അർപ്പിക്കുന്നത് തടയണമെന്നാണ് ഹർജിയിലെ പ്രധാന ആവശ്യം. പാത്രിയാർക്കീസിനെയും സംഘത്തെയും ആത്മീയ കർമ്മങ്ങൾ നിർവഹിക്കുന്നതിൽ നിന്ന് വിലക്കണമെന്നും ആവശ്യപ്പെട്ടിട്ടുണ്ട്.

ഒരു വശത്ത് സമാധാന ആഹ്വാനം നടത്തുകയും മറുവശത്ത് കോടതി വിധികൾ ലംഘിക്കാൻ ഒരുക്കങ്ങൾ നടത്തുകയും ചെയ്യുന്നത് അംഗീകരിക്കാനാവില്ലെന്ന് ഓർത്തഡോക്സ് സഭ പത്രക്കുറിപ്പിൽ കുറ്റപ്പെടുത്തി.

മലങ്കര സഭയുടെ പള്ളികളിൽ പ്രവേശിക്കാൻ പാത്രിയാർക്കീസിന് മലങ്കര മെത്രാപ്പോലീത്തായുടെ അനുമതി നിർബന്ധമാണ്. 1995-ലെ കോടതി വിധിയിൽ ഇക്കാര്യം വ്യക്തമാക്കിയിട്ടുണ്ട്. സഭയിൽ സമാന്തര ഭരണം പാടില്ലെന്ന് 2017-ലെ സുപ്രീംകോടതി വിധിയും ആവർത്തിച്ച് വ്യക്തമാക്കിയിട്ടുണ്ടെന്നും പത്രക്കുറിപ്പിൽ പറയുന്നു.

ഓർത്തഡോക്സ് സഭയുടെ പത്രക്കുറിപ്പ്