കാതോലിക്കേറ്റ് മലങ്കരയിൽ സ്ഥാപിച്ചതിന്റെ 114-ാം വാർഷികം 20ന്

കോട്ടയം: മലങ്കര ഓർത്തഡോക്സ് സുറിയാനി സഭയുടെ കാതോലിക്കേറ്റ് മലങ്കരയിൽ സ്ഥാപിച്ചതിന്റെ 114-ാം വാർഷികം ഓർത്തഡോക്സ് ക്രൈസ്തവ യുവജനപ്രസ്ഥാനത്തിന്റെ നേതൃത്വത്തിൽ ആഘോഷിക്കും. കാതോലിക്കേറ്റ് സ്ഥാപന വാർഷികത്തിനും മലങ്കര നസ്രാണി യുവജനസംഗമത്തിനും 20നു കോട്ടയം തിരുനക്കര മൈതാനം വേദിയാകും.

ഉച്ചകഴിഞ്ഞ് രണ്ടിന് നടക്കുന്ന റാലി കോട്ടയം മാർ ഏലിയാ കത്തീഡ്രലിൽനിന്ന് ആരംഭിക്കും. തുടർന്നു ചേരുന്ന പൊതുസമ്മേളനം മന്ത്രി രമേശ് ചെന്നിത്തല ഉദ്ഘാടനം ചെയ്യും. യുവജനപ്രസ്ഥാനം പ്രസിഡന്റ് ഡോ. ഗീവർഗീസ് മാർ യൂലിയോസ് മെത്രാപ്പോലീത്ത അധ്യക്ഷത വഹിക്കും.മലങ്കര സഭാധ്യക്ഷൻ പരിശുദ്ധ ബസേലിയോസ് മാർ തോമ്മാ മാത്യൂസ് തൃതീയൻ കാതോലിക്കാ ബാവാ അനുഗ്രഹസന്ദേശം നൽകും.

നിയമസഭാ സ്പീക്കർ തിരുവഞ്ചൂർ രാധാകൃഷ്ണൻ മുഖ്യാതിഥിയാകും. കുറിയാക്കോസ് മാർ ക്ലീമിസ് യുവജനസന്ദേശം നൽകും. ഡോ. യൂഹാനോൻ മാർ ദിയസ്കോറസ് മെത്രാപ്പോലീത്ത കാതോലിക്കേറ്റ് സ്ഥാപന വാർഷിക പ്രഭാഷണം നടത്തും. മെത്രാപ്പോലീത്തമാരായ ഡോ. ജോസഫ് മാർ ദിവന്നാസിയോസ്, ഡോ. മാത്യൂസ് മാർ തീമോത്തിയോസ്, ഡോ. എബ്രഹാം മാർ സെറാഫിം, ഫ്രാൻസിസ് ജോർജ് എംപി, എംഎൽഎമാരായ കെ.എൻ. ബാലഗോപാൽ, ബി. ഗോപകുമാർ, റെജി ചെറിയാൻ, അബിൻ വർക്കി, കോട്ടയം മുനിസിപ്പൽ ചെയർമാൻ എം.പി. സന്തോഷ് കുമാർ, ജില്ലാ പഞ്ചായത്ത് പ്രസിഡന്റ് ജോഷി ഫിലിപ്പ്, സഭാ വൈദിക ട്രസ്റ്റി ഫാ. ഡോ. തോമസ് വർഗീസ് അമയിൽ, അൽമായ ട്രസ്റ്റി റോണി വർഗീസ് എബ്രഹാം, സഭാ സെക്രട്ടറി ബിജു ഉമ്മൻ, മറിയ ഉമ്മൻ തുടങ്ങിയവർ പങ്കെടുക്കും.

സോദരൻ ഒരു സൗഹൃദ പദ്ധതിയുടെ മൊബൈൽ ആപ്ലിക്കേഷൻ ഫ്രാൻസിസ് ജോർജ് എംപി പുറത്തിറക്കും. പത്രസമ്മേളനത്തിൽ ഒസിബൈഎം പ്രസിഡന്റ് ഡോ. ഗീവർഗീസ് മാർ യൂലിയോസ് മെത്രാപ്പോലീത്ത, വൈസ് പ്രസിഡന്റ് ഫാ. ജെയിൻ സി. മാത്യു, ജനറൽ സെക്രട്ടറി ഫാ. വിജു ഏലിയാസ്, ട്രഷറർ റെഞ്ചു എം. ജോയ്, റീജിയണൽ സെക്രട്ടറി ഡാനി രാജു, റോണി ചേലമ്പറം, നെവിൻ കുരുവിള തോമസ്, അരുൺ പി. ജോൺ എന്നിവർ പങ്കെടുത്തു.