വിശ്വാസ തീഷ്ണതയിൽ കൊടിയേറ്റം ; പുതുപ്പള്ളി പള്ളി പെരുന്നാൾ തുടക്കം

കോട്ടയം: പ്രഥമ ജോർജ്ജിയൻ തീർത്ഥാടന കേന്ദ്രമായ പുതുപ്പള്ളി സെന്റ് ജോർജ് ഓർത്തഡോക്‌സ് വലിയപള്ളിയിൽ വിശുദ്ധ ഗീവർഗീസ് സഹദായുടെ ഓർമ്മ പെരുന്നാളിന് കൊടിയേറി. എറികാട്, പുതുപ്പള്ളി കരകളിൽ നിന്ന് ഘോഷയാത്രയായി കൊണ്ടുവന്ന കൊടിമരത്തിൽ സഖറിയാസ് മാർ സേവേറിയോസ് മെത്രപ്പോലീത്ത കൊടിയേറ്റി. വൈദ്യുതി ദീപാലങ്കാരങ്ങളുടെ സ്വിച്ച് ഓൺകർമ്മം വികാരി ഫാ.ആൻഡ്രൂസ് ടി.ജോൺ നിർവഹിച്ചു. ദിവസവും രാവിലെ വിശുദ്ധ കുർബാന, മദ്ധ്യസ്ഥപ്രാർത്ഥന, വൈകിട്ട് 5.30ന് സന്ധ്യാ നമസ്‌ക്കാരം. മേയ് 1 മുതൽ 4 വരെയാണ് പുതുപ്പള്ളി കൺവെൻഷൻ. ഇന്ന് രാവിലെ 10ന് വയോജനസംഗമം. മേയ് 5 മുതൽ 7 വരെയാണ് പ്രധാന പെരുന്നാൾ.

മേയ് മൂന്നിന് നടക്കുന്ന സാംസ്‌കാരിക സമ്മേളനത്തിൽ ഓർഡർ ഓഫ് സെന്റ് ജോർജ് പുരസ്‌കാരം എം.ജി.എം ഗ്രൂപ്പ് ഓഫ് ഇൻസ്റ്റിറ്റിയൂഷൻസ് ചെയർമാൻ ഡോ. ഗീവർഗീസ് യോഹന്നാന് നൽകും. 6ന് രാവിലെ 11ന് പൊന്നിൻ കുരിശ് ത്രോണോസിൽ പ്രതിഷ്ഠിക്കും. അഞ്ചിന് വെച്ചൂട്ട് സദ്യ ഒരുക്കുന്നതിനുള്ള വിറകിടീൽച്ചടങ്ങ്, പന്തിരുനാഴി പുറത്തെടുക്കൽ, സന്ധ്യാനമസ്‌കാരത്തിന് ശേഷം പുതുപ്പള്ളി കവലചുറ്റി പ്രദക്ഷിണം.

പ്രധാന പെരുന്നാൾ ദിവസമായ മെയ് 7 ന് പരിശുദ്ധ ബസേലിയോസ്  മാർത്തോമ്മാ മാത്യൂസ് തൃതീയൻ കാതോലിക്കാ ബാവായുടെ മുഖ്യ കാർമികത്വത്തിൽ ഒൻപതിന്മേൽ കുർബാന. തുടർന്ന് വെച്ചൂട്ട് നേർച്ചസദ്യ, കുട്ടികൾക്കുള്ള ആദ്യ ചോറൂണ്, സമാപന പ്രദക്ഷിണത്തിന് ശേഷം അപ്പവും കോഴിയിറച്ചിയും നേർച്ച.