ക്രൈസ്തവ സമൂഹത്തിനെതിരെ വെല്ലുവിളികളുണ്ട് ; തുറന്നു പറച്ചിലുമായി കാതോലിക്കാ ബാവ
പത്തനംതിട്ട: ക്രൈസ്തവ സമൂഹത്തിനു നേരേയുള്ള വെല്ലുവിളികളെ വിശ്വാസ സ്ഥിരതയോടെ നേരിടണമെന്ന് പരിശുദ്ധ ബസേലിയോസ് മാര്ത്തോമ്മാ മാത്യൂസ് തൃതീയന് കാതോലിക്കാ ബാവ. നിലയ്ക്കല് എക്യുമെനിക്കൽ ട്രസ്റ്റിന്റെ ആഭിമുഖ്യത്തില് നിലയ്ക്കല് നസ്രാണി സംഗമം ഉദ്ഘാടനവും റൂബി ജൂബിലി സ്മരണിക പ്രകാശനവും മൈലപ്ര തിരുഹൃദയ പള്ളി ഓഡിറ്റോറിയത്തില് നിര്വഹിച്ചു പ്രസംഗിക്കുകയായിരുന്നു അദ്ദേഹം.
ക്രിസ്തീയ വിശ്വാസത്തിനെതിരേ വെല്ലുവിളികള് ഉയരുമ്പോള് സുസ്ഥിര വിശ്വാസത്തോടെ അതിനെ നേരിടുകയെന്നതാണ് മാര്ത്തോമ്മന് പൈതൃകമെന്ന് കാതോലിക്കാ ബാവ ഓര്മിപ്പിച്ചു. വിശ്വാസത്തില് സ്ഥിരതയും ധൈര്യത്തോടെ പ്രതിസന്ധികളെ നേരിട്ടയാളുമാണ് വിശുദ്ധ തോമാശ്ലീഹ. അദ്ദേഹത്തിന്റെ മക്കളാണെന്നു നാം അഭിമാനിക്കുമ്പോള് ആക്രമണങ്ങളെ ധൈര്യപൂര്വം നേരിടാനാകണം. ഉത്തരേന്ത്യന് സംസ്ഥാനങ്ങളില് അടിയേറ്റ കന്യാസ്ത്രീകള് പീഡനങ്ങളെ ധൈര്യപൂര്വം നേരിടുന്ന കാഴ്ചയാണ് നാം കണ്ടത്. ഇതു നമ്മെ ധൈര്യപ്പെടുത്തുന്നതാകണമെന്ന് കാതോലിക്കാ ബാവ പറഞ്ഞു.
സാമൂഹിക പ്രതിബദ്ധതയോടെയുള്ള പ്രവര്ത്തനം മാര്ത്തോമ്മന് പാരമ്പര്യമാണ്. നന്മ പ്രവൃത്തികള് ചെയ്യുന്ന സമൂഹത്തിനുനേരേ അക്രമങ്ങള് വരുമ്പോള് അതു ക്രിസ്തീയതയോടെയുള്ള വെല്ലുവിളിയായി കാണാനാകില്ല. നമ്മള് ചെയ്യുന്ന നന്മ മറ്റുള്ളവരിലേക്ക് എത്തുന്നതു കാണുമ്പോഴുണ്ടാകുന്ന മറ്റു ചില വികാരങ്ങളാകാം. ഐക്യത്തോടെ നാം മുമ്പോട്ടു പോകേണ്ട കാലഘട്ടമാണിത്. ഒറ്റപ്പെട്ടു പോയാല് ആക്രമണങ്ങളെ ചെറുക്കാന് നമുക്കാകില്ല. ക്രിസ്തുവിലുള്ള സാമൂഹിക പ്രതിബദ്ധതയില് ജീവിക്കുകയും പ്രവര്ത്തിക്കുകയും ചെയ്യുന്നതിനൊപ്പം സഭകളുടെ ഐക്യം കാലഘട്ടത്തിന്റെ അനിവാര്യതയാണെന്ന ചുവരെഴുത്ത് നാം തിരിച്ചറിയണമെന്നും കാതോലിക്കാ ബാവ പറഞ്ഞു.
എഫ്സിആര്എ ഭേദഗതിയിലൂടെ ഉണ്ടായിരിക്കുന്ന ആശങ്കകള് മാറ്റാന് തയാറാകണമെന്ന് അധ്യക്ഷത വഹിച്ച ഡോ.തിയഡോഷ്യസ് മാര്ത്തോമ്മാ മെത്രാപ്പോലീത്ത പറഞ്ഞു. സമൂഹത്തിന്റെ ജീവല് പ്രശ്നങ്ങളോടു പ്രതികരിക്കുകയും അവ ഏറ്റെടുത്തുകൊണ്ട് കരുതലിന്റെ കരങ്ങള് നീട്ടാനും വെല്ലുവിളികള്ക്കെതിരേ പ്രതികരിക്കാനും സഭകള് തയാറാകേണ്ടതുണ്ടെന്നും അദ്ദേഹം അഭിപ്രായപ്പെട്ടു.
ഡോ. ജോസഫ് മാര് ബര്ണബാസ് സഫ്രഗന് മെത്രാപ്പോലീത്ത, ഡോ.സാമുവേല് മാര് ഐറേനിയോസ് മെത്രാപ്പോലീത്ത, ഡോ.ജോഷ്വാ മാര് നിക്കോദിമോസ് മെത്രാപ്പോലീത്ത, ബിഷപ് ഗീവര്ഗീസ് മാര് അപ്രേം, ജോണ്സണ് കല്ലിട്ടതില് കോര് എപ്പിസ്കോപ്പ, ഫാ. ഏബ്രഹാം തേക്കടയില്, അഡ്വ.സുരേഷ് കോശി, നിലയ്ക്കല് എക്യുമെനിക്കല് ട്രസ്റ്റ് ട്രഷറാര് ഏബ്രഹാം ഇട്ടിച്ചെറിയ, അഡ്മിനിസ്ട്രേറ്റര് ഫാ. ഷൈജു മാത്യു, റോയി മാത്യു മുളമൂട്ടില് കോര് എപ്പിസ്കോപ്പ, നിലയ്ക്കല് എക്യുമെനിക്കല് ട്രസ്റ്റ് അംഗങ്ങളായ തോമസുകുട്ടി തേവരുമുറിയിൽ, ബോബി ഏബ്രഹാം, ജോര്ജ് മാമ്മന് കൊണ്ടൂര്, ഏബ്രഹാം മാത്യു പനച്ചമൂട്ടില് തുടങ്ങിയവര് പ്രസംഗിച്ചു.
