പിതാക്കന്മാരുടെ കണ്ണീരും പ്രാർത്ഥനയും കണ്ടനാട് ഭദ്രാസനത്തിന്റെ വളർച്ചക്ക് പിന്നിൽ : പരി.കാതോലിക്ക ബാവ

എറണാകുളം : കണ്ടനാട് ഭദ്രാസനത്തിന്റെ ശതോത്തര കനക ജൂബിലിയും കണ്ടനാട് വെസ്റ്റ് ഭദ്രാസന ദിനവും കുടുംബ സംഗമവും പരിശുദ്ധ സഭയുടെ സുന്നഹദോസ് സെക്രട്ടറി അഭി. യൂഹാന്നോൻ മാർ ക്രിസോസ്റ്റമോസ് തിരുമേനിയുടെ അദ്ധ്യക്ഷതയിൽ കോലഞ്ചേരിയിൽ ബസേലിയസ് പൗലോസ് പ്രഥമൻ നഗറിൽ പരിശുദ്ധ ബസേലിയോസ് മാർത്തോമാ മാത്യൂസ് തൃതീയൻ കാതോലിക്ക ബാവാ ഉദ്ഘാടനം ചെയ്തു. പൂർവസൂരികളായ പിതാക്കന്മാരുടെ കണ്ണീരും പ്രാർത്ഥനയും ഭദ്രാസനത്തിന്റെ ഇന്നത്തെ വളർച്ചക്ക് പ്രധാന കാരണമാണെന്ന് ഓർപ്പിച്ചുകൊണ്ട്, അവരുടെ ത്യാഗങ്ങളുടെ സാക്ഷ്യമായി വർത്തമാന കാലത്തെ ഭദ്രാസനത്തിന്റെ പ്രവർത്തനങ്ങൾ തുടരണമെന്ന് പരിശുദ്ധ കാതോലിക്കാ ബാവാ പറഞ്ഞു. നീതി സ്ഥിരപ്പെടുന്നതിനും, ശാന്തതയോടെ ജീവിക്കുന്നതിനും കുടുംബ ബന്ധങ്ങൾ സ്നേഹത്തിലും വിശ്വാസത്തിലും ഉറപ്പിക്കപ്പെടണമെന്ന് കോട്ടയം ഗവൺമെന്റ് മെഡിക്കൽ കോളജ് പ്രിൻസിപ്പൽ ഡോ. വർഗീസ് പുന്നൂസ് മുഖ്യപ്രഭാഷണത്തിൽ ഓർമിപ്പിച്ചു. അഭി. സഖറിയ മാർ സേവേറിയോസ്, തിരുമേനി, അൽമായ ട്രസ്റ്റീ ശ്രീ. റോണി വർഗീസ്, അസ്സോസിയേഷൻ സെക്രട്ടറി അഡ്വ. ശ്രീ. ബിജു ഉമ്മൻ, ഭദ്രാസന സെക്രട്ടറി ഫാ. ജോസ് തോമസ്, പൂവത്തുങ്കൽ, ഫാ. ജോൺസ് എബ്രഹാം റീശ് കോർ എപ്പിസ്കോപ്പ മലങ്കര മൽപ്പാൻ, പൂതൃക്ക പഞ്ചായത്ത് പ്രസിഡന്റ് ശ്രീമതി. പൂജ ജോമോൻ, എറണാകുളം ജില്ലാ പഞ്ചായത്ത് മെമ്പർ ശ്രീ.സുജിത്ത് പോൾ, പൂതൃക്ക പഞ്ചായത്ത് 5 ആം വാർഡ് മെമ്പർ ശ്രീ. ബാബു വർഗീസ് എന്നിവർ പ്രസംഗിച്ചു.