എത്യോപ്യന്‍ പാത്രിയര്‍ക്കീസ് പരിശുദ്ധ ആബൂനാ മത്ഥിയാസ് കേരളം സന്ദര്‍ശിക്കുന്നു

എത്യോപ്യന്‍ ഓര്‍ത്തഡോക്സ് സഭാ തലവന്‍ പരിശുദ്ധ ആബൂനാ മത്ഥിയാസ് നവംബര്‍ 19 മുതല്‍ 25 വരെ സംസ്ഥാന അതിഥിയായി കേരളം സന്ദര്‍ശിക്കുന്നു. നവംബര്‍ 19 ന് ശനി 11.30 ന് കൊച്ചി വിമാന താവളത്തില്‍ ഓര്‍ത്തഡോക്സ് സഭാ പ്രതിനിധിസംഘം പരിശുദ്ധ എത്യോപ്യന്‍ പാത്രിയര്‍ക്കീസിനെയും സംഘത്തെയും സ്വീകരിക്കും. 20-താം തീയതി ഞായര്‍ 7.30ന് ആര്‍ത്താറ്റ് സെന്‍റ് മേരീസ് പളളിയില്‍ വി. കുര്‍ബ്ബാന അര്‍പ്പിക്കും. 12 മണിക്ക് പഴഞ്ഞിയില്‍ സ്വീകരണത്തില്‍ പങ്കെടുക്കും.

പഴയ സെമിനാരി സ്ഥാപകന്‍ സഭാ ജ്യോതിസ്സ് പുലിക്കോട്ടില്‍ ജോസഫ് മാര്‍ ദിവന്നാസിയോസിന്‍റെ ചരമദിശ്വതാബ്ദി ആഘോഷ സമാപനം കുന്നംകുളം മലങ്കര മെഡിക്കല്‍ മിഷന്‍ മൈതാനത്തില്‍ മാര്‍ ദിവന്നാസിയോസ് നഗറില്‍ 4 മണിക്ക് മുഖ്യമന്ത്രി പിണറായി വിജയന്‍ ഉദ്ഘാടനം ചെയ്യും. പരിശുദ്ധ പാത്രിയര്‍ക്കീസ് ബാവാ മുഖ്യാതിഥി ആയിരിക്കും.

ഇരുപത്തിരണ്ടാം  തീയതി 2.30 മണിക്ക് കുഴിമറ്റം സെന്‍റ് ജോര്‍ജ്ജ് സണ്‍ഡേസ്ക്കൂള്‍ ശതാബ്ദി ഉദ്ഘാടനം ചെയ്യും. 5 മണിക്ക് കോട്ടയം മാമ്മന്‍ മാപ്പിള ഹാളില്‍ പരിശുദ്ധ ബസേലിയോസ് മാര്‍ത്തോമ്മാ പൗലോസ് ദ്വിതീയന്‍ കാതോലിക്കാ ബാവായുടെ സപ്തതി സ്മാരക കാന്‍സര്‍ ചികിത്സാ സഹായ പദ്ധതിയായ സ്നേഹസ്പര്‍ശം, കെ.എസ് ചിത്രയുടെ സംഗീതാര്‍ച്ചന എന്നിവയില്‍ മുഖ്യാതിഥി ആയിരിക്കും. നവംബര്‍ ഇരുപത്തിമൂന്നാം തീയതി 10.30 ന് പരുമല സെന്‍റ് ഗ്രീഗോറിയോസ് ഇന്‍റര്‍നാഷണല്‍ കാന്‍സര്‍ റിസേര്‍ച്ച് സെന്‍ററിന്‍റെ കൂദാശയില്‍ പങ്കെടുക്കും. 2.30 ന് നിരണം സെന്‍റ് മേരീസ് പളളി സന്ദര്‍ശിക്കും.

ഇരുപത്തിനാലാം തീയതി 7.30 ന് കോട്ടയം പഴയസെമിനാരി ചാപ്പലില്‍ വി. കുര്‍ബ്ബാന അര്‍പ്പിക്കുകയും പുലിക്കോട്ടില്‍ ജോസഫ് മാര്‍ ദിവന്നാസിയോസ് രണ്ടാമന്‍ തിരുമേനിയുടെ ഇരുനൂറാം ചരമ അനുസ്മരണത്തില്‍ പങ്കെടുക്കുകയും ചെയ്യും.

3.4 കോടി അംഗങ്ങളും, 60 മെത്രാപ്പോലീത്താമാരും 44 ഭദ്രാസനങ്ങളും 32537 വൈദീകരുമുളള എത്യോപ്യന്‍ ഓര്‍ത്തഡോക്സ് സഭയുമായി മലങ്കര സഭ പൗരാണിക കാലം മുതല്‍ സൗഹൃദ ബന്ധവും കൗദാശിക സംസര്‍ഗവും പുലര്‍ത്തിയിരുന്നു. പഴയ സെമിനാരി പ്രിന്‍സിപ്പല്‍ ഫാ. പോള്‍ വര്‍ഗീസ്, (പിന്നീട് ഡോ. പൗലോസ് മാര്‍ ഗ്രീഗോറിയോസ്) എത്യോപ്യന്‍ ചക്രവര്‍ത്തി ഹെയ്ലി സെലാസിയുടെ വിദ്യാഭ്യാസ മന്ത്രിയും ഉപദേശകനുമായി സേവനമനുഷ്ഠിച്ചിരുന്നു.