സമ്പത്തിനും പദവിക്കുമപ്പുറം ജീവിതം: മാർ സേവേറിയോസ്

പത്തനംതിട്ട : ലോകസമ്പത്തിനും പദവിക്കുമപ്പുറം ജീവിതത്തെ അർഥവത്താക്കുന്ന ആത്യന്തിക ലക്ഷ്യത്തിൽ ശ്രദ്ധ കൊടുത്ത് ജീവിക്കണമെന്ന് ഓർത്തഡോക്സ് സഭ സുന്നഹദോസ് സെക്രട്ടറിയും കണ്ടനാട് വെസ്റ്റ് അധ്യക്ഷനുമായ  ഡോ. മാത്യൂസ് മാർ  സേവേറിയോസ്. പി.ഐ. മാത്യൂസ് റമ്പാച്ചന്റെ ശ്രാദ്ധപ്പെരുന്നാളിനോടനു ബന്ധിച്ച് മൈലപ്ര മാർ കുര്യാക്കോസ് ആശ്രമത്തിൽ നടന്ന മൂന്നിന്മേൽ കുർബാനയ്ക്ക് അദ്ദേഹം കാർമികത്വം വഹിച്ചു. ജേക്കബ് ജോൺ കോറെപ്പിസ്കോപ്പ, നഥാനിയേൽ റമ്പാൻ എന്നിവർ സഹകാർമികരായി. ഫാ. ഡോ. ജോൺ തോമസ് കരിങ്ങാട്ടിൽ‌ അനുസ്മരണ പ്രഭാഷണം നടത്തി. കബറിങ്കൽ ധൂപപ്രാർഥനയും നേർച്ചസദ്യയും നടന്നു. അട്ടച്ചാക്കൽ സെന്‍റ്  ജോർജ് സ്കൂളിലെ അധ്യാപകരുടെ സമ്മേളനവും ആശ്രമത്തിൽ സംഘടിപ്പിച്ചിരുന്നു.