പരുമല പള്ളിപ്പെരുന്നാൾ ഒക്ടോബർ 26 മുതൽ

തിരുവല്ല : പരിശുദ്ധനായ പരുമല തിരുമേനിയുടെ 124-മത് ഓർമ്മപ്പെരുന്നാളിന് ഒക്ടോബർ 26 മുതൽ ആരംഭിക്കുന്നു.2 മണിക്ക് മലങ്കര സഭാ അധ്യക്ഷൻ പരിശുദ്ധ ബസ്സേലിയോസ്‌ മാർത്തോമാ മാത്യൂസ്‌ തൃതീയൻ കാതോലിക്ക ബാവ പെരുന്നാളിന് തുടക്കംക്കുറിച്ച് കൊടിയേറ്റ് നിർവ്വഹിക്കും. പരിശുദ്ധ കാതോലിക്കാ ബാവായും മറ്റ് മെത്രാപ്പോലീത്തമാരും ചേർന്ന് പെരുന്നാൾ ശുശ്രൂഷകൾക്ക് നേതൃത്വം നൽകും. ഇതിന്റെ ഭാഗമായി വിശുദ്ധ കുർബാന, പ്രഭാഷണങ്ങൾ, പദയാത്രികരുടെ സ്വീകരണം, ധ്യാന പരിപാടികൾ, റാസ തുടങ്ങിയവ നടക്കും.

നവംബർ 1, 2 തീയതികളാണ് പ്രധാന പെരുന്നാൾ ദിനങ്ങൾ. നവംബർ ഒന്നിന് ഉച്ചകഴിഞ്ഞ് 2.30ന് നടക്കുന്ന തീർത്ഥാടന വാരാഘോഷ സമാപന സമ്മേളനത്തിൽ നടൻ മമ്മൂട്ടി പങ്കെടുക്കും. നവംബർ 2ന് റാസയോടെ പെരുന്നാൾ സമാപിക്കും.

മലങ്കര സഭയുടെ പ്രഥമ പ്രഖ്യാപിത പരിശുദ്ധൻ പരുമല തിരുമേനിയുടെ ഓർമ്മപ്പെരുന്നാളിന് മുന്നോടിയായി അവലോകന യോഗം ചേർന്നു. നവംബർ ഒന്ന്, രണ്ട് തീയതികളിൽ നടക്കുന്ന പ്രസിദ്ധമായ പരുമല പള്ളിപ്പെരുന്നാളിനു മുബായി മാന്നാർ പഞ്ചായത്തിൽ സ്വീകരിക്കേണ്ട നടപടികൾ കൂടിയാലോചിക്കുന്നതിനായി വിവിധ വകുപ്പുകളുടെ യോഗം മാന്നാർ ഗ്രാമപഞ്ചായത്ത് പ്രസിഡന്റ് ബി.കെ. പ്രസാദ് അധ്യക്ഷതയിൽ ചേർന്നു.

പെരുന്നാളിനോടനുബന്ധിച്ച് മാന്നാർ ഗ്രാമപഞ്ചായത്തിന്റെ പരിധിയിൽ തീർത്ഥാടന യാത്ര വരുന്ന പ്രദേശങ്ങളിൽ വഴിവിളക്കുകൾ തെളിക്കുന്നതിനും തകർന്നുകിടക്കുന്ന റോഡുകൾ അറ്റക്കുറ്റ പണികൾ പൂർത്തിയാക്കി സഞ്ചാരയോഗ്യമാക്കണമെന്നും ആരോഗ്യവകുപ്പിന്റെ നേതൃത്വത്തിൽ ഹെൽപ്പ് ഡെസ്കും സ്ക്വാഡുകളെയും ഉൾപ്പെടെയുള്ള പ്രവർത്തനങ്ങൾ നടത്തുന്നതിനും വിവിധ വകുപ്പ് ഉദ്യോഗസ്ഥരോട് യോഗത്തിൽ നിർദ്ദേശിച്ചു.

പഞ്ചായത്ത് വൈസ് പ്രസിഡന്റ് പി.എ. ലത, സ്ഥിരം സമിതി അധ്യക്ഷരായ ടെട്ടൂസ് പി. കുര്യൻ, എസ്. ചന്ദ്രകുമാർ, സെക്രട്ടറി ബിന്ദു, പൊതുമരാമത്ത് ഉദ്യോഗസ്ഥരായ അഞ്ജു, ഡി.പി. മെഡിക്കൽ ഓഫീസർമാരായ ഡോ. ചിത്രാ സാബു, ഡോ. നീലി ആർ. നായർ, ഹെൽത്ത് ഇൻസ്പെക്ടർ റെജി ഡെയ്ൻസ്, കെ.എസ്.ഇ.ബി. അസി. എൻജിനീയർ ബി. വിനോദ്, വി.ഇ. ജി. ജിജോ, ഗ്രാമപഞ്ചായത്ത് അംഗങ്ങൾ, ഹരിതകർമ്മ സേനാംഗങ്ങൾ, സി.ഡി.എസ്. ചെയർപേഴ്സൺ എനിവർ പങ്കെടുത്തു.