പിറവം പള്ളിയിലെ അതിക്രമം ; പ്രതിഷേധവുമായി ഓർത്തഡോക്സ് സഭ

കോട്ടയം: പിറവം സെന്റ് മേരീസ് ഓർത്തഡോക്സ് കത്തീഡ്രലിൽ വലിയ പള്ളിയിൽ സമാധാനപരമായി ആരാധന നടന്നു വരുന്നതിനിടെ യാക്കോബായ വിഭാഗം നടത്തിയ അതിക്രമങ്ങളിൽ മലങ്കര ഓർത്തഡോക്സ് സുറിയാനി സഭ ശക്തമായ പ്രതിഷേധം രേഖപ്പെടുത്തി.

സമാധാനപരമായി ആരാധന നടക്കുന്ന പള്ളികളിൽ സംഘർഷമുണ്ടാക്കുന്നതിൽ നിന്ന് യാക്കോബായ വിഭാഗം പിന്മാറണമെന്ന് മലങ്കര ഓർത്തഡോക്സ് സുറിയാനി സഭയുടെ മാധ്യമ വിഭാഗം പ്രസിഡന്റ് ഡോ. യൂഹാനോൻ മാർ ദിയസ്കോറോസ് മെത്രാപ്പോലീത്താ ആവശ്യപ്പെട്ടു. പിറവം വലിയ പള്ളി വികാരി റവ. ഫാ. ഏലിയാസ് ചെറുകാടിനെ കയ്യേറ്റം ചെയ്ത നടപടി അപലപനീയമാണ്. പ്രാർത്ഥനാ റാലി എന്ന പേരിൽ സംഘടിപ്പിച്ച റാലി അക്രമ റാലിയായി മാറിയ കാഴ്ചയാണ് പിറവത്ത് കണ്ടത്.

2017-ലെ സുപ്രീം കോടതി വിധി പ്രകാരം മാതൃസഭയുടെ ഭാഗമായ ദൈവാലയമാണ് പിറവം വലിയ പള്ളി. വിധി നടപ്പായ പള്ളി കയ്യേറാൻ ശ്രമിക്കുന്നത് രാജ്യത്തെ നിയമവ്യവസ്ഥയോടുള്ള വെല്ലുവിളിയാണെന്നും മെത്രാപ്പോലീത്താ പറഞ്ഞു. പരിക്കേറ്റ ഫാ. ഏലിയാസ് ചെറുകാട് ആശുപത്രിയിൽ ചികിത്സയിലാണ്. വികാരിയെ മർദ്ദിച്ചവർക്കെതിരെ ശക്തമായ നിയമനടപടി സ്വീകരിക്കണമെന്ന് സഭ സർക്കാരിനോട് ആവശ്യപ്പെട്ടു. ഒരു വശത്ത് സമാധാന ചർച്ചകൾ വേണമെന്ന് പറയുകയും മറുവശത്ത് അക്രമം അഴിച്ചുവിട്ട് നിയമലംഘനം നടത്തുകയും ചെയ്യുന്നത് ശാശ്വത സമാധാനത്തിന് ഭൂഷണമല്ലെന്നും അദ്ദേഹം ചൂണ്ടിക്കാട്ടി.

മലങ്കര സഭയുടെ ഭരണക്രമങ്ങൾക്കനുസൃതമായി തികച്ചും സമാധാനപരമായി ആരാധനകളും ദൈനംദിന കർമ്മങ്ങളും നടന്നു വരുന്ന പള്ളിയിലാണ് വിഘടിത വിഭാഗം പ്രകോപനം സൃഷ്ടിച്ചതെന്ന് അൽമായ ട്രസ്റ്റി റോണി വർഗീസ് എബ്രഹാം പ്രസ്താവിച്ചു. സുപ്രീം കോടതി വിധി നടപ്പാക്കിയ പള്ളികളിൽ അസ്വസ്ഥത നിലനിൽക്കുന്നു എന്ന തെറ്റായ ധാരണ പൊതുസമൂഹത്തിലും സർക്കാരിലും സൃഷ്ടിക്കാനുള്ള ആസൂത്രിത നീക്കമാണിത്. ആരാധന തടസ്സപ്പെടുത്തുകയും വൈദികരെ കയ്യേറ്റം ചെയ്യുകയും വിശ്വാസികളെ ഭീഷണിപ്പെടുത്തുകയും ചെയ്ത ശേഷം, ക്രമസമാധാന പ്രശ്നമുണ്ടെന്ന് വരുത്തി തീർക്കാൻ സ്വയം ചിത്രീകരിച്ച വീഡിയോകൾ തെറ്റായ വിവരണങ്ങളോടെ പ്രചരിപ്പിക്കുന്നത് ഇവരുടെ സ്ഥിരം തന്ത്രമാണെന്നും അദ്ദേഹം പറഞ്ഞു. അക്രമികൾക്കെതിരെ ശക്തമായ നിയമനടപടി സ്വീകരിക്കാൻ സർക്കാരും പോലീസും അടിയന്തരമായി ഇടപെടണമെന്നും അദ്ദേഹം ആവശ്യപ്പെട്ടു.