പിറവം പള്ളിയിൽ യാക്കോബായ അക്രമം ; വികാരിക്ക് പരിക്ക്

എറണാകുളം: ചരിത്ര പ്രസിദ്ധമായ പിറവം സെന്റ് മേരീസ് ഓർത്തഡോക്സ് കത്തീഡ്രൽ വലിയ പള്ളിയിൽ യാക്കോബായ വിഭാഗം സംഘർഷം സൃഷ്ടിച്ചു.

മലങ്കര സഭയിലെ സമാധാന അന്തരീക്ഷം തകർക്കാൻ ലക്ഷ്യമിട്ടുള്ള ആസൂത്രിത നീക്കത്തിന്റെ ഭാഗമായാണ് ആക്രമണമെന്ന് വിശ്വാസികൾ . യാക്കോബായ നേതൃത്വത്തിന്റെ അറിവോടെയാണ് അക്രമം നടന്നതെന്നാണ് സൂചന. പിറവത്തെ ചുമതലയുള്ളതും പുത്തൻകുരിശ് ഉന്നതാധികാര സമിതി അംഗവുമായ വൈദികന്റെ നേതൃത്വത്തിലാണ് റാലിയും തുടർന്നുള്ള കയ്യാങ്കളിയും നടന്നത്.

സുപ്രീം കോടതി വിധി പിറവം പള്ളിയിൽ നടപ്പാക്കിയിട്ട് ഏഴ് വർഷം പൂർത്തിയാകുന്ന സന്ദർഭത്തിലാണ് കലാപശ്രമം. നേരത്തെ ആൾക്കൂട്ടത്തെ ഉപയോഗിച്ച് കോടതി വിധി നടപ്പാക്കുന്നത് തടസ്സപ്പെടുത്തിയിരുന്ന യാക്കോബായ വിഭാഗത്തിന്റെ നീക്കങ്ങൾക്കെതിരെ ഹൈക്കോടതി കർശന നിർദ്ദേശം നൽകിയതിനെ തുടർന്നാണ് പോലീസ് പള്ളിയിൽ ഇടപെട്ടത്. യാക്കോബായ വിഭാഗത്തിലെ വൈദികർക്ക് പള്ളിയിൽ പ്രവേശനത്തിന് വ്യക്തമായ വിലക്ക് നിലനിൽക്കെയാണ് വീണ്ടും ആക്രമണമുണ്ടായത്.

സംഘർഷത്തിൽ പരിക്കേറ്റ വികാരി ഫാ. ഏലിയാസ് ചെറുകാടും ഓർത്തഡോക്സ് സഭയിലെ വിശ്വാസികളും കോലഞ്ചേരി എംഒഎസ്‌സി മെഡിക്കൽ കോളേജ് ആശുപത്രിയിൽ ചികിത്സ തേടി.