വികാരിയെ മർദ്ദിച്ച സംഭവം; സംസ്ഥാന പോലീസ് മേധാവിക്ക് പരാതി
പിറവം: പിറവം സെന്റ് മേരീസ് ഓർത്തഡോക്സ് കത്തീഡ്രൽ വലിയ പള്ളിയിൽ അതിക്രമിച്ചു കയറി വികാരി റവ. ഫാ. ഏലിയാസ് ചെറുകാടിനെ മർദ്ദിച്ച യാക്കോബായ വിഭാഗക്കാർക്കെതിരെ നടപടി ആവശ്യപ്പെട്ട് സംസ്ഥാന പോലീസ് മേധാവിക്ക് പരാതി നൽകി. ഭരണ സമിതിക്ക് വേണ്ടി ട്രസ്റ്റി പരാതി നൽകിയത്.
പള്ളി കൈയേറും എന്ന് കാട്ടി സമൂഹമാധ്യമങ്ങളിൽ പ്രചാരണം നടന്നതിനെ തുടർന്ന് വിഷയം നേരത്തെ പോലീസിന്റെ ശ്രദ്ധയിൽപ്പെടുത്തിയിരുന്നു. ഇതിന്റെ അടിസ്ഥാനത്തിൽ വെള്ളിയാഴ്ച പുത്തൻകുരിശ് ഡി.വൈ.എസ്.പിയുടെ നേതൃത്വത്തിൽ പിറവം പോലീസ് സ്റ്റേഷനിൽ യോഗം ചേർന്നിരുന്നു. യാക്കോബായ വിഭാഗം പള്ളി കോമ്പൗണ്ടിൽ പ്രവേശിക്കരുതെന്ന് പോലീസ് കർശന നിർദ്ദേശം നൽകുകയും ചെയ്തു. എന്നാൽ ഈ നിർദ്ദേശം അവഗണിച്ച് യാക്കോബായ വൈദികർ ഉൾപ്പെട്ട സംഘം പള്ളി കോമ്പൗണ്ടിൽ അതിക്രമിച്ചു കയറിയെന്നാണ് പരാതിയിൽ പറയുന്നത്.
കോടതി ഉത്തരവുകൾ ലംഘിച്ച് അതിക്രമം കാട്ടിയവർക്കെതിരെ നടപടി ആവശ്യപ്പെട്ട് ഇടവക ട്രസ്റ്റി ബാബു മങ്കിടിയാണ് പരാതി നൽകിയത്. സംഭവത്തിൽ കോലഞ്ചേരി മെഡിക്കൽ കോളേജിൽ ചികിത്സയിൽ കഴിയുന്ന ഫാ. ഏലിയാസ് ചെറുകാടിന്റെ മൊഴി പോലീസ് രേഖപ്പെടുത്തി.
