എത്യോപ്യയിൽ സ്ലീബാ പെരുന്നാൾ ; മലങ്കര സഭാ അധ്യക്ഷൻ മുഖ്യാതിഥി
ആഡിസ് അബാബ : കിഴക്കിന്റെ കാതോലിക്കായും മലങ്കര മെത്രാപ്പോലീത്തായും പരമാധ്യക്ഷനുമായ പരിശുദ്ധ ബസേലിയോസ് മാർത്തോമ്മാ മാത്യൂസ് തൃതീയൻ കാതോലിക്കാ ബാവ ശ്ലൈഹിക സന്ദർശനത്തിനായി എത്യോപ്യയിലെത്തി.
എത്യോപ്യൻ ഓർത്തഡോക്സ് തെവാഹെദോ സഭയുടെ പരമാധ്യക്ഷൻ ആബൂനാ മത്തിയാസ് പാത്രിയർക്കീസിന്റെ ക്ഷണപ്രകാരമാണ് സന്ദർശനം. എത്യോപ്യൻ സഭയുടെ പ്രധാന തിരുനാളായ സ്ലീബാ പെരുന്നാളിൽ പരിശുദ്ധ ബാവ മുഖ്യാതിഥിയാകും.ഓർത്തഡോക്സ് വിശ്വാസത്തെ മുറുകെ പിടിക്കുകയും ഉയർത്തിപ്പിടിക്കുകയും ചെയ്യുന്ന വലിയ വിശ്വാസി സമൂഹത്തെ കാണാനും അവരോട് സംവദിക്കാനും വീണ്ടും അനുഗ്രഹീതമായ അവസരമെന്ന് പരിശുദ്ധ കാതോലിക്ക ബാവ കുറിച്ചു.
ആഡിസ് അബാബയിലെ ബോലെ അന്താരാഷ്ട്ര വിമാനത്താവളത്തിൽ എത്യോപ്യൻ സഭയുടെ ആർച്ച് ബിഷപ്പുമാരായ ആബൂനാ മൽക്കിസദേക്ക്, ആബൂനാ ദിയസ്ക്കോറോസ് എന്നിവർ ചേർന്ന് പരിശുദ്ധ കാതോലിക്കാ ബാവയ്ക്ക് സ്വീകരണം നൽകി. തുടർന്ന് ഹോളി ട്രിനിറ്റി കത്തീഡ്രലിൽ നടന്ന ഔദ്യോഗിക സ്വീകരണത്തിൽ പാത്രിയർക്കീസ് പരിശുദ്ധ ആബൂനാ മത്തിയാസ് നേരിട്ടെത്തി മലങ്കര സഭാധ്യക്ഷനെ വരവേറ്റു. ഇരു സഭാ തലവന്മാരും ചേർന്ന് കത്തീഡ്രലിൽ പ്രാർത്ഥന നടത്തി.
പാത്രിയാർക്കേറ്റ് ആസ്ഥാനത്ത് ഇരുസഭാ തലവന്മാരുടെയും ഔദ്യോഗിക കൂടിക്കാഴ്ച നടക്കും. ഓറിയന്റൽ ഓർത്തഡോക്സ് സഭാ കുടുംബത്തിലെ സഹോദരി സഭകളാണ് മലങ്കര ഓർത്തഡോക്സ് സുറിയാനി സഭയും എത്യോപ്യൻ ഓർത്തഡോക്സ് തെവാഹെദോ സഭയും.
യുനെസ്കോയുടെ സാംസ്കാരിക പൈതൃക പട്ടികയിൽ ഇടം നേടിയ സ്ലീബാ പെരുന്നാൾ ശനിയാഴ്ചയാണ്. നാലാം നൂറ്റാണ്ടിൽ ഹെലനി റാണി യേശുക്രിസ്തുവിനെ ക്രൂശിച്ച കുരിശ് കണ്ടെടുത്തതിന്റെ ഓർമ്മയായാണ് ഈ പെരുന്നാൾ ആഘോഷിക്കുന്നത്. തലസ്ഥാനമായ ആഡിസ് അബാബയിലെ മെസ്കൽ സ്ക്വയറിൽ ലക്ഷക്കണക്കിന് വിശ്വാസികൾ പങ്കെടുക്കുന്ന ആഘോഷ ചടങ്ങുകൾ നടക്കും.
പരിശുദ്ധ കാതോലിക്കാ ബാവയെ അനുഗമിച്ച് അലക്സിയോസ് മാർ യൗസേബിയോസ്, ഡോ. യൂഹാനോൻ മാർ ദിയസ്കോറോസ്, ഫാ. ഡോ. ജോസി ജേക്കബ്, ഫാ. അശ്വിൻ ഫെർണാണ്ടസ്, ഫാ. ഗീവർഗീസ് ജോൺസൺ, ജേക്കബ് മാത്യു, ജോജോ പി. ജോൺ എന്നിവരടങ്ങിയ പ്രതിനിധി സംഘവും എത്യോപ്യയിലെത്തിയിട്ടുണ്ട്.
