ഓപ്പറേഷൻ തൂഫാൻ ; പിന്തുണച്ച് ഓർത്തഡോക്സ് യുവജന പ്രസ്ഥാനം

കോട്ടയം : ‘ഓപ്പറേഷൻ തൂഫാൻ’ പിന്തുണയുമായി ഓർത്തഡോക്സ് സഭ. സ്കൂളുകളിൽ ലഹരി വ്യാപനം തടയാൻ സംസ്ഥാന സർക്കാർ നടപ്പാക്കുന്ന പദ്ധതിക്ക് കൈത്താങ്ങുമായി ഓർത്തഡോക്സ് ക്രൈസ്തവ യുവജന പ്രസ്ഥാനം (ഒസിവൈഎം) രംഗത്ത് . പദ്ധതിയുടെ ഭാഗമായി 25 സിസിടിവി ക്യാമറകൾ നൽകുമെന്ന് യുവജന പ്രസ്ഥാനം കേന്ദ്ര ഭാരവാഹികൾ ആഭ്യന്തര മന്ത്രി രമേശ് ചെന്നിത്തലയെ അറിയിച്ചു.

കാതോലിക്കേറ്റ് സ്ഥാപനത്തിന്റെ 114-ാം വാർഷികത്തോടനുബന്ധിച്ച് ഓർത്തഡോക്സ് യുവജന പ്രസ്ഥാനം കോട്ടയത്ത് സംഘടിപ്പിച്ച മലങ്കര നസ്രാണി യുവജന സംഗമം ഉദ്ഘാടനം ചെയ്യാനെത്തിയപ്പോഴാണ് മന്ത്രിയെ ഇക്കാര്യം അറിയിച്ചത്.

സംഗമത്തിൽ പരിശുദ്ധ ബസേലിയോസ് മാർത്തോമ്മാ മാത്യൂസ് തൃതീയൻ കാതോലിക്കാ ബാവാ അനുഗ്രഹ പ്രഭാഷണം നടത്തി. ഒരു നൂറ്റാണ്ട് മുൻപ് മലങ്കരയിൽ സ്ഥാപിതമായ കാതോലിക്കേറ്റ് ദൈവകൃപയുടെ വലിയ അടയാളമാണെന്ന് പരിശുദ്ധ കാതോലിക്ക ബാവാ പറഞ്ഞു. മലങ്കര സഭയുടെ യുവജനങ്ങളാണ് കാതോലിക്കേറ്റിന്റെ കാവൽഭടന്മാർ എന്നും, വയോജനങ്ങളെ ചേർത്തുപിടിക്കാനും നാടിന്റെ പ്രതിസന്ധികളിൽ കൈകോർക്കാനും യുവശക്തിക്ക് കഴിയണമെന്നും മലങ്കര സഭാധ്യക്ഷൻ കൂട്ടിച്ചേർത്തു.

ഒസിവൈഎം പ്രസിഡന്റ് ഡോ. ഗീവർഗീസ് മാർ യൂലിയോസ് അധ്യക്ഷത വഹിച്ചു. ചെങ്ങന്നൂർ ഭദ്രാസനാധിപൻ ഡോ. മാത്യൂസ് മാർ തിമോത്തിയോസ് യുവജന സന്ദേശവും കോട്ടയം ഭദ്രാസനാധിപൻ ഡോ. യൂഹാനോൻ മാർ ദിയസ്കോറസ് കാതോലിക്കേറ്റ് സ്ഥാപന വാർഷിക സന്ദേശവും നൽകി.

ചലച്ചിത്രതാരം മാത്യു തോമസ് മുഖ്യാതിഥിയായി. സൗദർന് ഒരു സൗധം ഭവനപദ്ധതിയുടെ മൊബൈൽ ആപ്ലിക്കേഷൻ സ്പീക്കർ തിരുവഞ്ചൂർ രാധാകൃഷ്ണൻ പുറത്തിറക്കി. യുവജനപ്രസ്ഥാനം ഭാരവാഹിയും യുവ സംരംഭകൻ കൂടിയായ ജിജോ ടി. ജോർജ്, ഭവനപദ്ധതിയിലേക്ക് 5 ലക്ഷം രൂപയുടെ ചെക്ക് കൈമാറി. മാത്യൂസ് മാർ തേവോദോസിയോസ്, ഡോ. ജോസഫ് മാർ ദിവന്നാസിയോസ്, ഡോ. യൂഹാനോൻ മാർ തേവോദോറോസ് തുടങ്ങിയവർ പങ്കെടുത്തു.