പത്തനംതിട്ട കാതോലിക്കേറ്റ് കോളേജ് 75-മത് വാർഷികാഘോഷം
പത്തനംതിട്ട : മലയോര ജില്ലയുടെ ഉന്നത വിദ്യാഭ്യാസ സ്വപ്നങ്ങൾക്ക് പിന്തുണ പകർന്ന പത്തനംതിട്ട കാതോലിക്കേറ്റ് കോളേജ് 75–ാം വയസിലേക്ക്. പ്ലാറ്റിനം ജൂബിലിയുടെ ഭാഗമായി ഒരു വർഷം നീളുന്ന ആഘോഷമാണ് സംഘടിപ്പിക്കുന്നതെന്ന് കോളേജ് റസിഡന്റ് മാനേജർ ഡോ. എബ്രഹാം മാർ സെറാഫിം മെത്രാപ്പൊലീത്ത വാർത്താസമ്മേളനത്തിൽ പറഞ്ഞു.
1952 ആഗസ്ത് ഒന്നിന് തിരുവിതാംകൂർ രാജപ്രമുഖൻ ബാലരാമവർമ്മയാണ് കോളേജ് ഉദ്ഘാടനം ചെയ്തത്. കോളേജ് സ്ഥാപിതമായി മൂന്ന് ദശകങ്ങൾക്ക് ശേഷമാണ് പത്തനംതിട്ട ജില്ല രൂപീകൃതമായത്. ഇന്റർമീഡിയറ്റ് തലത്തിൽ 140 വിദ്യാർഥികളും 10 അധ്യാപകരുമായി തുടങ്ങിയ സ്ഥാപനം നൂറ്റിഇരുപതിലധികം അധ്യാപകരും 1500ലധികം വിദ്യാർഥികളുമായി കേരളത്തിലെ ഏറ്റവും മികച്ച കലാലയങ്ങളിലൊന്നായി വളർന്നുകഴിഞ്ഞു. പുതുതായി നിർമിതബുദ്ധി, സൈക്കോളജി കോഴ്സുകൾ കൂടി ആരംഭിക്കാനുള്ള തയ്യാറെടുപ്പിലാണ് അധികൃതർ.
പ്ലാറ്റിനം ജൂബിലി ലോഗോ പ്രകാശനവും ഓഫീസ് ഉദ്ഘാടനവും വ്യാഴാഴ്ച കോളേജ് റസിഡന്റ് മാനേജർ ഡോ. എബ്രഹാം മാർ സെറാഫിം മെത്രാപ്പൊലീത്ത നിർവഹിച്ചു. പ്ലാറ്റിനം ജൂബിലി ആഘോഷങ്ങളോടനുബന്ധിച്ച് കോളേജിന്റെ ചരിത്രത്തിലാദ്യമായി ബിരുദദാനച്ചടങ്ങും നടത്തും. വിജയം കൈവരിച്ച ബിരുദ, ഗവേഷക വിദ്യാർഥികൾക്കായാണ് വെള്ളിയാഴ്ച ബിരുദദാനച്ചടങ്ങ്. തിങ്കളാഴ്ച ദീപശിഖാപ്രയാണവും നടക്കും.
വാർത്താസമ്മേളനത്തിൽ പ്രിൻസിപ്പൽ പ്രൊഫ. റെന്നി പി വർഗീസ്, ബർസാർ പ്രൊഫ. ബിനോയ് ടി തോമസ്, ഗവേണിങ് ബോർഡംഗം ഫാ. ജോൺസൻ കല്ലിട്ടതിൽ കോർ എപ്പിസ്കോപ്പ, ഡോ. ഷൈനി ടി അലക്സാണ്ടർ, ഡോ. ശൈനോ ഹന്ന വർഗീസ് എന്നിവരും പങ്കെടുത്തു.
സ്വയംഭരണ പദവി; നടപടി തുടങ്ങി
കാതോലിക്കേറ്റ് കോളേജിന് സ്വയംഭരണപദവി നേടിയെടുക്കാനുള്ള നടപടികൾക്ക് തുടക്കമിട്ടതായും അധികൃതർ പറഞ്ഞു. ഇക്കാര്യം യോഗത്തിൽ അജണ്ടയായി വച്ച് തീരുമാനമെടുത്തു. നടപടികൾക്കായി മാനേജ്മെന്റ് സർവകലാശാലയെ സമീപിച്ചിട്ടുണ്ട്. സ്വയംഭരണ പദവി ലഭിച്ചാൽ പുതുതലമുറ കോഴ്സുകൾ യഥേഷ്ടം ആരംഭിക്കാനാകും.
