ലഹരിക്കെതിരായ പോരാട്ടത്തിൽ വെള്ളം ചേർക്കരുത്: മദ്യനയത്തിനെതിരെ ഓർത്തഡോക്സ് സഭ
കോട്ടയം: വീര്യം കുറഞ്ഞ മദ്യത്തിന് നികുതി ഇളവ് നൽകാനുള്ള സംസ്ഥാന സർക്കാരിന്റെ ബജറ്റ് നിർദേശത്തിനെതിരെ മലങ്കര ഓർത്തഡോക്സ് സുറിയാനി സഭ കടുത്ത പ്രതിഷേധം രേഖപ്പെടുത്തി.ചെറിയ ലഹരി മിഠായികളിൽ നിന്ന് തുടങ്ങി കുട്ടികൾ പിന്നീട് മാരകമായ മയക്കുമരുന്നുകളുടെ പിടിയിലാകുന്ന സാഹചര്യം നിലവിലുണ്ടെന്നും, വീര്യം കുറഞ്ഞ മദ്യം ലഭ്യമാക്കിയാൽ യുവാക്കൾ മാരക ലഹരി തേടി പോകില്ലെന്ന വാദം യുക്തിരഹിതമാണെന്നും മലങ്കര സഭ മാധ്യമ വിഭാഗം പ്രസിഡന്റ് ഡോ.യുഹാനോൻ മാർ ദിയസ്ക്കോറോസ് മെത്രാപ്പോലീത്ത പുറത്തിറക്കിയ പത്രക്കുറിപ്പിൽ വ്യക്തമാക്കി.
ജനങ്ങൾക്ക് നന്മ ചെയ്യാനാണ് സർക്കാർ അധികാരത്തിലിരിക്കുന്നത് അല്ലാതെ അവരെ ലഹരിയുടെ അടിമയാക്കാനല്ലെന്ന് ഓർത്തഡോക്സ് സഭ സർക്കാരിനെ ഓർമ്മിപ്പിച്ചു. സ്ത്രീകളുടെ സൗജന്യ യാത്ര, വയോജന വകുപ്പ് തുടങ്ങിയ മാതൃകാപരമായ തീരുമാനങ്ങൾ കൈകൊണ്ട സംസ്ഥാന സർക്കാരിൽ നിന്ന് ജനക്ഷേമകരമായ നയങ്ങളാണ് സമൂഹം പ്രതീക്ഷിക്കുന്നതെന്നും മദ്യനയത്തിലെ ഈ തെറ്റ് സർക്കാർ തിരുത്തുമെന്നാണ് കരുതുന്നതെന്നും പ്രസ്താവനയിൽ പറയുന്നു. ലഹരിക്ക് വീര്യം കുറഞ്ഞതെന്നോ കൂടിയതെന്നോ ഉള്ള വ്യത്യാസമില്ലെന്നും എല്ലാ ലഹരിയും വിഷമാണെന്നുമാണ് മാർ ദിയസ്ക്കോറോസ് വിമർശിച്ചു.
ഈ വിഷയത്തിൽ വി.എം. സുധീരനെപ്പോലുള്ളവർ തിരുത്തൽ ശക്തിയായി നിലകൊള്ളുന്നതിനെ മലങ്കര സഭ സ്വാഗതം ചെയ്തു. ഏത് സർക്കാർ വന്നാലും ലഹരിക്കെതിരായ പരിശുദ്ധ സഭയുടെ നിലപാടിൽ മാറ്റമുണ്ടാകില്ലെന്നും അദ്ദേഹം കൂട്ടിച്ചേർത്തു.
