സഭാക്കേസിലും യു ടേൺ ഉണ്ടാകുമോ ; സർക്കാർ നിലപാടുകളിൽ ചർച്ച
തിരുവനന്തപുരം: ശബരിമല യുവതി പ്രവേശനത്തിൽ നിലപാട് മാറ്റാൻ ഒരുങ്ങി സർക്കാർ. ശബരിമലക്കേസിൽ പുതിയ നിലപാട് സുപ്രീംകോടതിയിൽ അറിയിക്കും.ശബരിമലക്കേസ് വിധി നടത്തിപ്പിനെ സംബന്ധിച്ച് നിലപാടിൽ മാറ്റം വരുത്തുന്നതോടെ സജീവ ചർച്ചയാവുകയാണ് സഭാക്കേസിലെയും സർക്കാർ നിലപാട്.
കോടതി വിധി നടപ്പാക്കാതെ യാക്കോബായ പക്ഷ അനുകൂല നിലപാടിനൊപ്പമാണ് സർക്കാർ.സുപ്രീം കോടതി വിധികളിൽ സർക്കാർ പുലർത്തുന്ന വ്യത്യസ്ത സമീപനത്തിൽ ചർച്ചകൾക്ക് തുടക്കമിട്ടിരിക്കുകയാണ് തൃശൂർ ഭദ്രാസന അധിപൻ ഡോ.യുഹാനോൻ മാർ മിലിത്തിയോസ് മെത്രാപ്പോലീത്താ.ഓർത്തഡോക്സ് സഭാ വിഷയത്തിലും ഇതുവരെ സ്വീകരിച്ച നിലപാടിലും യൂ ടേൺ ഉണ്ടാകുമോ – ഫെയിസ്ബുക്ക് പോസ്റ്റിൽ മാർ മിലിത്തിയോസ് അഭിപ്രായപ്പെട്ടു.
വിധി നടപ്പായാൽ ചോര പുഴ ഒഴുകുമെന്നാണ് സർക്കാർ പിറവം പള്ളിക്കേസിലും മുളന്തുരുത്തിക്കേസിലും യാക്കോബായ പക്ഷത്തോട് ചേർന്ന് കോടതിയിൽ വാദിച്ചിരുന്നു.എന്നാൽ,ഇവിടെങ്ങളിൽ വിധികൾ നടപ്പായിരുന്നു.വിധി നടപ്പാക്കിയ പള്ളികളിൽ സമാധാന പൂർവ്വം ആരാധന നടന്ന് വരുന്നു.യാക്കോബായ പ്രീണനത്തിന്റെ ഭാഗമായി സെമിത്തേരി ബില്ല് സർക്കാർ ഇതിനിടെ നടപ്പാക്കുകയും ചെയ്തു.സുപ്രീം കോടതി വിധിയെ മറി കടക്കാൻ ചർച്ചു ബില്ല് നടപ്പാക്കാൻ ശ്രമം ഉണ്ടായിരുന്നുവെങ്കിലും യാക്കോബായ ഭൂരിപക്ഷം എന്ന് അവകാശപ്പെടുന്ന മേഖലകളിൽ തിരെഞ്ഞെടുപ്പിൽ ഇടത് മുന്നണിക്ക് കനത്ത പരാജയം നേരിട്ടതോടെ പിന്നോട്ട് പോവുകയായിരുന്നു.ഇതിൽ യാക്കോബായ വിഭാഗം ഒഴികെ ക്രൈസ്തവ സഭകളുടെ എതിർപ്പും ഘടകമായി.
