ഓർത്തഡോക്സ് സഭക്ക് നാല് മെത്രാന്മാരെ തിരെഞ്ഞെടുക്കാൻ മലങ്കര അസോസിയേഷൻ ചേരും

കോട്ടയം : ഓർത്തഡോക്സ് സഭയ്ക്ക് പുതിയ നാല് മെത്രാപ്പോലീത്താന്മാരെ കണ്ടെത്താൻ മലങ്കര അസോസിയേഷൻ ഇക്കൊല്ലം വിളിച്ചു ചേർക്കുമെന്ന് റിപ്പോർട്ട് .ഇതേ സംബന്ധിച്ച് സഭാ സമിതിയായ മാനേജിംഗ് കമ്മിറ്റി യോഗത്തിൽ തീരുമാനം ഉണ്ടായെന്ന് സൂചന.ഓർത്തഡോക്സ് സഭയിൽ മെത്രാപ്പോലീത്താമാരെ തിരെഞ്ഞെടുക്കുന്നത് തികച്ചും ജനാധിപത്യ രീതിയിലാണ്.ഇടവകപ്പള്ളി പ്രാതിനിധ്യം കണക്കിലെടുത്ത് തെരെഞ്ഞെടുക്കപ്പെടുന്ന ഇന്ത്യയിലും പുറത്തുള്ള നാലായിരത്തോളം പ്രതിനിധികൾക്കാണ് മലങ്കര സുറിയാനി ക്രിസ്ത്യാനി അസോസിയേഷൻ ചേരുമ്പോൾ തിരെഞ്ഞെടുപ്പിൽ വോട്ടവകാശമുള്ളത്.മെത്രാൻ തിരെഞ്ഞെടുപ്പും മലങ്കര അസോസിയേഷൻ ക്രമീകരണങ്ങളും പ്രത്യേകം ചർച്ച ചെയ്യാൻ സഭാ മാനേജിംഗ് കമ്മിറ്റിയുടെ വിശേഷ യോഗം ഏപ്രിൽ 8 ന് ചേരും.

മലങ്കര അസോസിയേഷൻ തിരെഞ്ഞെടുപ്പ് ഓൺലൈനായിരുന്നു അവസാനം ചേർന്നത്. എറണാകുളത്ത് കോലഞ്ചേരിയിൽ 2022-ൽ ചേർന്ന മലങ്കര അസോസിയേഷനിൽ ഏഴ് മെത്രാപ്പോലീത്താമാരെ തിരെഞ്ഞെടുത്തിരുന്നു. മലങ്കര അസോസിയേഷൻ അംഗങ്ങളിലെ അൽമായ, വൈദിക പ്രതിനിധികളുടെ വെവ്വേറെ 50 % വീതം വോട്ടും അധികമായി ഒരു വോട്ടും നേടണം എന്നതാണ് നിലവിലെ നിയമം . ഇപ്പോൾ 3998 അംഗങ്ങളാണ് മലങ്കര അസോസിയേഷനിലുള്ളത്.