കണ്ടനാട് വെസ്റ്റ് ഭദ്രാസന പൊതുയോഗം നടന്നു

മലങ്കര ഓർത്തഡോക്സ് സുറിയാനി സഭ കണ്ടനാട് വെസ്റ്റ് ഭദ്രാസന പൊതുയോഗം ഭദ്രാസന ആസ്ഥാനമായ കോലഞ്ചേരി പ്രസാദം സെന്റ്റിൽ വച്ച് നടന്നു. പരിശുദ്ധ ബസേലിയോസ് മാർത്തോമ്മാ മാത്യൂസ് തൃതിയൻ കാതോലിക്ക ബാവാ അധ്യക്ഷത വഹിച്ചു. സഭ പ്രയാസങ്ങളുടെ കാലഘട്ടത്തിൽ നിന്ന് ശാന്തമായ ഒരു തുറമുഖത്തേക്ക് അടുത്തുകൊണ്ടിരിക്കുകയാണ്. വ്യവഹാര രഹിത സഭയെന്ന ആത്യന്തിക ലക്ഷ്യത്തിലേക്ക് നമ്മുടെ സഭ അധികം വൈകാതെ എത്തിച്ചേരുമെന്ന് പരിശുദ്ധ ബാവ തിരുമേനി കൂട്ടി ചേർത്തു. പരിശുദ്ധ ബസേലിയോസ് മാർത്തോമാ പൗലോസ് ദ്വിതിയൻ കാതോലിക്ക ബാവ സഭയുടെ തനിമയും സ്വാതന്ത്ര്യത്തെയും മുറുകെപ്പിടിക്കുകയും എല്ലാവരെയും അതിനു വേണ്ടി ഉൽസാഹിപ്പിച്ച കാര്യം നമ്മൾ മറക്കരുതെന്ന് പരി. ബാവ തിരുമേനി ഓർമിപ്പിച്ചു.

ഭദ്രാസനത്തിൻറെ വാർഷിക റിപ്പോർട്ടും വരവ് ചിലവ് കണക്കുകളും പൊതുയോഗത്തിൽ അവതരിപ്പിക്കുകയും പൊതുയോഗം അത് പാസാക്കുകയും ചെയ്തു. 2021-2026 വർഷത്തേക്കുള്ള ഭദ്രാസന കൗൺസിലിനെ പൊതുയോഗത്തിൽ വച്ച് തിരഞ്ഞെടുത്തു. ഭദ്രാസന സെക്രട്ടറിയായി റവ. ഫാ. ജോസ് തോമസ് പൂവത്തുങ്കൽ, ഭദ്രാസന കൗൺസിൽ അംഗങ്ങളായി റവ. ഫാ. റോബിൻ മർക്കോസ്, റവ. ഫാ.എബ്രഹാം കെ.ജോൺ,ശ്രീ ഗ്ലാഡ്സൺ ചാക്കോ കുഴിയേലിൽ, ശ്രീ. റോയ് ജോൺ, ശ്രീ സജി വർക്കിച്ചൻ, അജു മാത്യു പുന്നക്കൽ എന്നിവരെയും തിരഞ്ഞെടുത്തു. ഭദ്രാസനത്തിൽ നിന്നുള്ള പത്താം ക്ലാസ് പന്ത്രണ്ടാം ക്ലാസ് മത്സര പരീക്ഷകളിൽ ഉന്നത വിജയം നേടിയ കുട്ടികളെ അനുമോദിക്കുകയും അവർക്കുള്ള പാരിതോഷികങ്ങൾ നൽകുകയും ചെയ്തു.