ഹൂസ്റ്റൻ മേഖല വനിതാ സമാജം കോൺഫറൻസ് ഏപ്രിൽ 8 ന് ഫ്രസ്നോയില്‍
ഹൂസ്റ്റൻ : വലിയ നോമ്പിനോടനുബന്ധിച്ച് മലങ്കര ഓർത്തഡോക്സ് സഭാ സൗത്ത്– വെസ്റ്റ് ഡയോസിസ് ഓഫ് അമേരിക്കയിലെ മർത്തമറിയം വനിതാ സമാജം (എംഎംവിഎസ്) ഹൂസ്റ്റൻ റീജനൽ കോൺഫറൻസും ധ്യാനവും ഏപ്രിൽ 8ന് രാവിലെ 7.30 മുതൽ 12.30 വരെ ഫ്രസ്നോയിലെ ഇല്ലിനോയ് സ്ട്രീറ്റിലുള്ള സെന്റ് പീറ്റേഴ്സ് ആൻഡ് സെന്റ് പോൾസ് ഓർത്തഡോക്സ് പള്ളിയിൽ നടത്തുമെന്ന് എംഎംവിഎസ് ഹൂസ്റ്റൻ റീജനൽ പ്രീസ്റ്റ് റവ. ഫാ. ഐസക്ക് ബി. പ്രകാശും റീജനൽ ഭാരവാഹികളായ സ്മിതാ സജിയും പുഷ്പാ തോമസും അറിയിച്ചു.
രാവിലെ 7.30ന് പ്രഭാത നമസ്കാരവും തുടർന്ന് റവ. ഫാ. ഫിലിപ്പ് മാത്യുവിന്റെ നേതൃത്വത്തിൽവിശുദ്ധ കുർബാനയും ഉണ്ടായിരിക്കും. 9.30ന് എംഎംവിഎസ് കോൺഫറൻസ് അഖില മലങ്കര മർത്തമറിയംവനിതാ സമാജം പ്രസിഡന്റും കൊട്ടാരക്കര –പുനലൂർ ഭദ്രാസന അധിപനുമായ ഡോ. യുഹാനോൻ മാർ തേവോദോസസ് ഉദ്ഘാടനം ചെയ്യും. മലങ്കര സഭാ ഹ്യൂമൻ റിസോഴ്സ് ഡയറക്ടർ ഫാ. പി. എ. ഫിലിപ്പ് നയിക്കുന്ന ധ്യാന പ്രസംഗം ഉണ്ടായിരിക്കും.
കോൺഫറൻസിന്റെ ഒരുക്കങ്ങൾക്ക് എംഎംവിഎസ് ഇടവക ഭാരവാഹികളായ ലാലമ്മ സാമുവേൽ, ഷീബാ ബോബൻ, ഗ്രേസി ഇട്ടൂപ്പ് എന്നിവർ നേതൃത്വം നൽകും.ഹൂസ്റ്റനിലും പരിസര പ്രദേശങ്ങളിലുമുള്ള എല്ലാ എംഎംവിഎസ് അംഗങ്ങളും പങ്കെടുക്കണമെന്ന് ഇടവകവികാരി ഫാ. ഐസക് ബി. പ്രകാശ്, സെക്രട്ടറി ഷിജിൻ തോമസ്, ട്രസ്റ്റി രാജു സ്കറിയാ എന്നിവർഅറിയിച്ചു.
