പിറവം, പിറമാടം പള്ളികളിലെ സംഘർഷം: ഓർത്തഡോക്സ് സഭ സർക്കാരിനോട്

കോട്ടയം: എറണാകുളം ജില്ലയിലെ പിറവം, പിറമാടം പള്ളികളിലെ സംഘർഷങ്ങളിൽ സർക്കാർ ശക്തമായ നടപടി സ്വീകരിക്കണമെന്ന് മലങ്കര ഓർത്തഡോക്സ് സുറിയാനി സഭയുടെ മാനേജിങ് കമ്മിറ്റി യോഗം ആവശ്യപ്പെട്ടു. കോട്ടയം പഴയ സെമിനാരിയിൽ ചേർന്ന യോഗം സഭയുടെ പ്രതിഷേധം രേഖപ്പെടുത്തി പ്രമേയം പാസാക്കി.

പിറമാടം പള്ളിയിൽ കോടതി വിധി അനുകൂലമായിരുന്നിട്ടും വികാരി ഫാ. എബിൻ എബ്രഹാമിന് മർദനമേറ്റു. 2019ൽ സുപ്രീംകോടതി വിധി നടപ്പായ പിറവം പള്ളിയിൽ പ്രാർഥന റാലി എന്ന പേരിലെത്തിയ യാക്കോബായ ആക്രമി സംഘം വികാരി ഫാ. ഏലിയാസ് ചെറുകാട്ടിനെ കൈയേറ്റം ചെയ്തു. പരിഷ്കൃത സമൂഹത്തിന് ചേരാത്ത പ്രവൃത്തികളാണ് യാക്കോബായ വിഭാഗത്തിൽ നിന്നുണ്ടായത്. വൈദികർക്ക് നേരെ ഉണ്ടായ അതിക്രമങ്ങളെ സഭാ മാനേജിങ് കമ്മിറ്റിയോഗം അപലപിച്ചു. കുറ്റക്കാർക്കെതിരെ നടപടി സ്വീകരിക്കുന്നതിൽ അധികാരികൾ നിസ്സംഗത പാലിക്കുന്നതിൽ യോഗം ആശങ്ക രേഖപ്പെടുത്തി. അസോസിയേഷൻ സെക്രട്ടറി അഡ്വ. ബിജു ഉമ്മൻ അവതരിപ്പിച്ച സഭയുടെ 2025-2026ലെ വരവുചെലവ് കണക്കുകൾ യോഗം പാസാക്കി. മലങ്കര സഭാധ്യക്ഷൻ പരിശുദ്ധ ബസേലിയോസ് മാർത്തോമ്മാ മാത്യൂസ് തൃതീയൻ കാതോലിക്കാ ബാവാ അധ്യക്ഷത വഹിച്ചു. സഭാ മെത്രാപ്പോലീത്തമാർ, സ്ഥാനികർ, മാനേജിങ് കമ്മിറ്റി അംഗങ്ങൾ എന്നിവർ സംബന്ധിച്ചു.