മെത്രാൻ തിരഞ്ഞെടുപ്പ് : പ്രാരംഭ ഘട്ട നടപടിക്ക് തുടക്കമിടാൻ ഓർത്തഡോക്സ് സഭ

കൊച്ചി : ഓർത്തഡോക്സ് സഭയിൽ മെത്രാപ്പോലീത്താമാരെ വാഴിക്കാൻ പ്രാരംഭ ഘട്ട നടപടികൾ ആരംഭിക്കുകയാണ് .നാല് മെത്രാന്മാരെ കണ്ടെത്താൻ സമ്മേളിക്കുന്ന മലങ്കര അസോസിയേഷൻ യോഗത്തിനെ സംബന്ധിച്ച് ചർച്ച ചെയ്തു തീരുമാനം കൈക്കൊള്ളാൻ സഭാ മാനേജിംഗ് കമ്മിറ്റിയുടെ പ്രത്യേക യോഗം ഏപ്രിൽ 15 ന് കോട്ടയത്ത്‌ പഴയ സെമിനാരിയിൽ വിളിച്ചു ചേർത്തിരിക്കുന്നത്.

മാനേജിങ് കമ്മിറ്റി നിശ്ചയിച്ചിരുന്നത് ഏപ്രിൽ എട്ടിനായിരുന്നു എങ്കിലും നിയമസഭാ തിരഞ്ഞെടുപ്പ് പ്രഖ്യാപിച്ചതിനെ തുടർന്നാണ് മാറ്റേണ്ടി വന്നത് . മെത്രാന്‍ സ്ഥാനത്തേയ്ക്കുള്ള തിരഞ്ഞെടുപ്പ് സംബന്ധിച്ച നടപടി ക്രമങ്ങൾ , ഭരണഘടന ഭേദഗതി സംബന്ധിച്ച് റൂളിംഗ് കമ്മിറ്റിയുടെ നിർദ്ദേശങ്ങൾ എന്നിവയാണ് സഭാ മാനേജിംഗ് കമ്മിറ്റിയുടെ അജണ്ടയായി പരിഗണിക്കുന്നതെന്ന് പരിശുദ്ധ കാതോലിക്ക ബാവ കല്പന മുഖാന്തരം അറിയിപ്പ് നൽകി.

നിലവിൽ ഒഴിഞ്ഞു കിടക്കുന്ന തിരുവനന്തപുരം, ബംഗളൂരു, ഏഷ്യാ-പസഫിക്ക്, യൂറോപ്പ് എന്നീ ഭദ്രാസനങ്ങളിലേക്ക് മെത്രാപ്പോലീത്താമാരെ കണ്ടെത്തേണ്ട പശ്ചാത്തലത്തിലാണ് മലങ്കര സുറിയാനി ക്രിസ്ത്യാനി അസോസിയേഷൻ വിളിച്ചു കൂട്ടി തെരഞ്ഞെടുപ്പ് നടത്താനുള്ള സാഹചര്യത്തിലെത്തിയത് .2027 മാർച്ചിൽ സഭാ ഭാരവാഹികളുടെ കാലാവധി പൂർത്തിയാകും.രണ്ടും പരിഗണിച്ചു മലങ്കര അസോസിയേഷൻ ഒറ്റ തവണ വിളിക്കണമെന്ന ആവിശ്യം ഇതിനോടകം വിശ്വാസികൾ നിന്ന് ഉയർന്നിട്ടുണ്ട്.

മലങ്കര അസോസിയേഷൻ തിരഞ്ഞെടുപ്പിലൂടെയാണ് മെത്രാന്മാരെയും സഭാ ഭാരവാഹികളെയും ഓർത്തഡോക്സ് സഭ കണ്ടെത്തുന്നത്.അൽമായ – വൈദീക ട്രസ്റ്റിമാരെ മലങ്കര അസോസിയേഷൻ വഴിയും സഭാ സെക്രട്ടറി എന്നറിയപ്പെടുന്ന മലങ്കര അസോസിയേഷൻ സെക്രട്ടറിയെ ഭദ്രാസനങ്ങളിൽ നിന്ന് വിജയിച്ചു വരുന്ന സഭാ മാനേജിംഗ് കമ്മിറ്റിയിലാണ് തിരഞ്ഞെടുക്കുന്നത് . മലങ്കര അസോസിയേഷനിൽ ഇന്ത്യക്ക് പുറത്ത് നിന്നടക്കം ഇടവക തലത്തിൽ നിന്ന് തിരെഞ്ഞെടുക്കപ്പെട്ട 4000-ഓളം പ്രതിനിധികൾക്കാണ് വോട്ടവകാശം.2017 ൽ ഓൺലൈൻ ആയിരുന്നു മലങ്കര അസോസിയേഷൻ തിരെഞ്ഞെടുപ്പ് പൂർത്തിയാക്കിയത്.അവസാനമായി ഇങ്ങനെ ഏഴ് മെത്രാപ്പോലീത്താമാരെ വാഴിച്ചിരുന്നു.