നിയമ സഭാ തിരെഞ്ഞെടുപ്പ് : സമദൂര നിലപാട് ദൗർബല്യമായി കാണരുതെന്ന് ഓർത്തഡോക്സ് സഭാ വൈദീക ട്രസ്റ്റി

ആസന്നമായിരിക്കുന്ന നിയമ സഭാ തിരെഞ്ഞെടുപ്പിൽ ഇടത് – വലത് മുന്നണികൾക്ക് മുന്നറിയിപ്പുമായി ഓർത്തഡോക്സ് സഭ.സഭാ അംഗങ്ങളായ നിരവധി പേർ രാഷ്ട്രീയപാർട്ടിയിലുണ്ട്. പാർട്ടികളുടെ സ്ഥാനാർത്ഥി പട്ടികയിൽ നഗ്നമായ സമുദായിക പ്രീണനങ്ങൾ ഉണ്ടായിരിക്കെ യോഗ്യരായവരെ ഉയർത്തിക്കാട്ടണമെന്ന് വൈദീക ട്രസ്റ്റി ഫാ.ഡോ.തോമസ് വർഗീസ് അമയിൽ.അവകാശങ്ങളും സീറ്റുകളും നേടിയെടുക്കാൻ മറ്റുള്ളവർ മത്സരിക്കുമ്പോൾ ഓർത്തഡോക്സ് സഭയുടെ വിശാല സമീപനം വിസ്മരിക്കുകയാണെന്നും ബഹു.അച്ഛൻ ഫെയിസ്ബുക്ക് പോസ്റ്റിൽ കുറ്റപ്പെടുത്തി.

ഫെയിസ്ബുക്ക് പോസ്റ്റിന്റെ പൂർണ്ണ രൂപം

സമദൂരം മലങ്കര സഭയുടെ സൗന്ദര്യമാണ് … ദൗർബല്യം അല്ല….

കേരളം വീണ്ടും ഒരു നിയമസഭാ തെരഞ്ഞെടുപ്പിന് ഒരുങ്ങുന്നു. വോട്ട് ബാങ്ക് രാഷ്ട്രീയത്തിനോട് എക്കാലത്തും മുഖംതിരിച്ചിട്ടുള്ള മലങ്കരസഭ ഇക്കുറിയും സ്വാഭാവികമായും സമദൂര നിലപാടായിരിക്കും സ്വീകരിക്കുക. സഭാം​ഗങ്ങളുടെ രാഷ്ട്രീയ കാഴ്ച്ചപ്പാടുകൾ വിഭിന്നമായതിനാലും വോട്ട് പൗരന്റെ സ്വകാര്യ അവകാശമായതിനാലുമാണ് സഭ സമദൂരം പാലിക്കുന്നത്. എന്നാൽ ഈ സമദൂരം യഥാർത്ഥ അർത്ഥത്തിൽ തിരിച്ചറിയാതെ നമ്മുടെ സഭാംഗങ്ങളെ അവർക്ക് അർഹമായ പരിഗണയിൽ നിന്ന് മാറ്റി നിർത്താൻ ഉപയോഗിക്കുന്നത് സങ്കടകരവും പ്രതിഷേധാർഹവും ആണ്. നഗ്‌നമായ സമുദായപ്രീണനങ്ങൾ എല്ലാ പാർട്ടിയുടെയും സ്ഥാനാർത്ഥി പട്ടികയിൽ ഉണ്ടുതാനും. അവകാശങ്ങളും, സീറ്റുകളും നേടിയെടുക്കാൻ മറ്റുള്ളവർ മത്സരിക്കുമ്പോൾ ഓർത്തോഡോക്സ് സഭയുടെ വിശാല കാഴ്ച്ചപാടുകൾ സൗകര്യപൂർവ്വം വിസ്മരിക്കുകയാണ്. കരയുന്ന കുഞ്ഞിനെ മാത്രമേ പരിഗണിക്കൂ എന്ന ചിന്തയിലേക്ക് രാഷ്ട്രീയ നേതൃത്വം മാറിയാൽ അതിലെന്ത് മതേതരത്വമാണുള്ളത് !

മലങ്കരസഭയുടെ ഉരുക്കുകോട്ടകളായ മണ്ഡലങ്ങളിൽ ആര് വാഴണം ആര് വീഴണമെന്ന് സഭ ഒറ്റക്കെട്ടായി തീരുമാനിച്ചാൽ സാധ്യമാകുമെന്നത് പ്രപഞ്ച സത്യമാണ്. ഈ യാഥാർത്ഥ്യം രാഷ്ട്രീപാർട്ടികൾക്കും അറിയാം. സഭാം​ഗങ്ങളായ നിരവധി പേർ വിവിധ രാഷ്ട്രീയപാർട്ടികളിലുണ്ട്.
യോ​ഗ്യരായവരെ ഉയർത്തിക്കാട്ടണം. സഭയെ പരി​ഗണിക്കുന്ന രാഷ്ട്രീയപാർട്ടികളെ ചേർത്ത് നിർത്തണം. തഴയുന്നവരെ അവ​ഗണിക്കുകതന്നെ വേണം. സഭാം​ഗങ്ങളല്ലാത്ത നിരവധി സുഹൃത്തുക്കൾ രാഷ്ട്രീയ മണ്ഡലത്തിലുണ്ട്. സ്വാധീന മേഖലകളിൽ സഭയുടെ സുഹൃത്തുക്കളെയും പിന്തുണയ്ക്കുന്നതിൽ തെറ്റുണ്ടെന്ന് കരുതുന്നില്ല. മലങ്കരസഭ നീതി അർഹിക്കുന്നവരാണെന്നും ഈ സഭയുടെ സ്വത്വം സംരക്ഷിക്കപ്പെടണമെന്നും പറയാൻ ആർജ്ജവമുള്ള ഏത് സ്ഥാനാർത്ഥിയെയും രാഷ്ട്രീയത്തിനപ്പുറം പിന്തുണയ്ക്കാൻ നാം തീരുമാനിച്ചാൽ എല്ലാം ശരിയാകും. മതേതര കാഴ്ച്ചപ്പാടും, മതേതര മൂല്യങ്ങളും ഉയർത്തിപ്പിടിക്കുന്നവരിലൂടെ ജനാധിപത്യം ശോഭിക്കട്ടെ.