മലബാര്‍ ഭദ്രാസന കണ്‍വന്‍ഷന്‍ നാളെ ചുങ്കത്തറില്‍ തുടങ്ങും
മലപ്പുറം : മലങ്കര ഓർത്തഡോക്സ് സഭ മലബാർ ഭദ്രാസന ക്രിസ്ത്യൻ കൺവൻഷൻ നാളെ ചുങ്കത്തറ സെന്‍റ് ജോര്‍ജ് ഓർത്തഡോക്സ് വലിയ പള്ളിക്കു സമീപം എംപിഎം ഹയർ സെക്കൻഡറി സ്കൂൾ ഗ്രൗണ്ടിൽ തുടങ്ങും.വൈകിട്ട് ആറിന് അടൂർ കടമ്പനാട് ഭദ്രാസനാധ്യക്ഷൻ ഡോ. സഖറിയാസ് മാർ അപ്രേം കൺവൻഷൻ ഉദ്ഘാടനം ചെയ്യും. മലബാർ ഭദ്രാസനാധിപൻ ഡോ. സഖറിയ മാർ തെയോഫിലോസ് ആധ്യക്ഷ്യം വഹിക്കും.
തുടർദിവസങ്ങളിലെ രാത്രിയോഗങ്ങളിൽ ഫാ. സഖറിയ നൈനാൻ ചിറത്തിലാട്ട്, ഫാ. ഡോ. ഒ.തോമസ്,റവ. ഡീക്കൺ അജി ഏബ്രഹാം, ഫാ. ഫിലിപ് തരകൻ, ഫാ. വർഗീസ് ടി.വർഗീസ്, ഫാ. ഡോ.കെ.വർഗീസ് എന്നിവർ വചനപ്രഭാഷണം നടത്തും. സമാപനദിവസമായ 22നു രാവിലെ എട്ടിന് ഡോ.സഖറിയ മാർ തെയോഫിലോസിന്റെ മുഖ്യകാർമികത്വത്തിൽ അഞ്ചിൻമേൽ കുർബാനയർപ്പിക്കും. തുടർന്നുനിലമ്പൂർ മേഖലയിലെ 24 ഇടവകളിൽനിന്നുള്ള സൺഡേ സ്കൂൾ വിദ്യാർഥികളുടെ റാലി നടക്കും.സമ്മാന, സ്കോളർഷിപ് വിതരണവും ഉണ്ടായിരിക്കും. കൺവൻഷന്റെ ഭാഗമായി ബാലസമാജം,എംജിഒസിഎസ്എം സംഗമം, എച്ച്ആർഇഎം, ദമ്പതി സമ്മേളനം, വൈദിക കുടുംബസംഗമം, യുവജന, വയോജന സംഗമം, സൺഡേ സ്കൂൾ അധ്യാപക സംഗമം, സുവിശേഷസംഘം പ്രാർഥനായോഗം എന്നിവയും ഒരുക്കിയിട്ടുണ്ട്.
കണ്ണൂർ, കോഴിക്കോട്, പാലക്കാട്, മലപ്പുറം ജില്ലകളിൽനിന്നായി 90 ഇടവകകളിൽനിന്നുള്ള ആറായിരത്തിലധികം കുടുംബങ്ങൾ പങ്കെടുക്കുന്ന കൺവൻഷന്റെ ഒരുക്കങ്ങൾ പൂർത്തിയായതായി ഭദ്രാസന സെക്രട്ടറിയും കൺവൻഷൻ ജനറൽ കൺവീനറുമായ ഫാ. തോമസ് കുര്യൻ താഴയിൽ, ട്രസ്റ്റി സണ്ണി മത്തായി കൊച്ചുതറയിൽ, സെക്രട്ടറി വി.കെ.ബിജു വട്ടംകണ്ടത്തിൽ, പ്രോഗ്രാം കമ്മിറ്റി ചെയർമാൻ ഫാ. എൻ.പി.ജേക്കബ് നെല്ലിക്കുഴിക്കാട്ട്, പ്രോഗ്രാം കമ്മിറ്റി കൺവീനർ അനിൽ പുല്ലാവള്ളിൽ എന്നിവർ അറിയിച്ചു.
(Representative Image)
