മലങ്കര സഭയുടെ സ്വാതന്ത്ര്യം ബലികഴിക്കില്ല

മുളന്തുരുത്തി: മലങ്കര ഓർത്തഡോക്സ് സുറിയാനി സഭയുടെ പാർലമെന്റായ മലങ്കര നസ്രാണി പള്ളി യോഗത്തിന് വെട്ടിക്കൽ സെന്റ് തോമസ് ദയറയിൽ തുടക്കമായി. പരിശുദ്ധ ബസേലിയോസ് മാർത്തോമ്മാ മാത്യൂസ് തൃതീയൻ കാതോലിക്കാ ബാവ അധ്യക്ഷതയിലാണ് പള്ളി പ്രതിനിധികൾ ചേരുന്നത് .നാല് പുതിയ മെത്രാപ്പോലീത്തമാരെ തെരഞ്ഞെടുക്കുന്നതിനായാണ് മലങ്കര സുറിയാനി ക്രിസ്ത്യാനി അസോസിയേഷൻ സമ്മേളിക്കുന്നത്. പരിശുദ്ധ സഭയുടെ ഭരണപരമായ കാര്യങ്ങളിലും ഭാവി പ്രവർത്തനങ്ങളിലും നിർണായക തീരുമാനങ്ങൾ യോഗത്തിൽ ഉണ്ടാകും.

മലങ്കര നസ്രാണി പള്ളി യോഗത്തെ അഭിസംബോധന ചെയ്ത മലങ്കര സഭാ അധ്യക്ഷൻ പരിശുദ്ധ കാതോലിക്കാ ബാവയുടെ പ്രസക്ത വാക്കുകൾ

“2017 ലെ ബഹുമാനപ്പെട്ട സുപ്രീം കോടതി വിധിയും, ഏതു പ്രതിസന്ധിയിലും മലങ്കര സഭയെ ഉരുക്കുകോട്ട പോലെ സംരക്ഷിക്കുന്ന 1934 ലെ ഭരണഘടനയും ഉപേക്ഷിച്ചുള്ള ഒരു ഒത്തുതീർപ്പിനും മലങ്കര സഭ ഒരുക്കമല്ല. സമാധാന ശ്രമങ്ങൾക്കും മധ്യസ്ഥ ചർച്ചകൾക്കും പരിശുദ്ധ സഭ എന്നും തയ്യാറാണ്. എന്നാൽ സമാധാന ശ്രമങ്ങളെന്ന പേരിൽ സഭയ്ക്ക് ലഭിച്ച സ്വാതന്ത്ര്യവും നീതിപൂർവമായ അവകാശവും ബലികഴിച്ച് ഒരു തലമുറയെ കൂടി വ്യവഹാരത്തിലേക്ക് ഇട്ടുകൊടുക്കുവാൻ ഒരുകാലത്തും ഒരുക്കമല്ല”

സഭാ തർക്കവുമായി ബന്ധപ്പെട്ട് സർക്കാർ നേതൃത്വത്തിൽ മധ്യസ്ഥ ചർച്ചകൾ ഒരുക്കമെന്ന വാർത്തകൾ പുറത്ത് വന്നതിന് പിന്നാലെ കാതോലിക്കാ ബാവ പരിശുദ്ധ സഭയുടെ നിലപാട് ശക്തമായി ആവർത്തിച്ചത്.